由細到大屋企人都話我靚仔，我有時照鏡都會咁覺得，雖然唔係郭富城吳彥祖級數，但我相信自己如果去做藝員應該係二線頭一線尾嗰班，起碼靚仔過黎耀祥，何況我有180cm，同香港普遍男仔比較都算係高啦！
雖然擁有180嘅身高，但我讀書時期從未拍過拖，主要因為性格內向，畢業後入咗一間近乎全女班嘅細公司做，由於裡面全部都係師奶，連僅有嘅幾個男同事都係阿叔，所以我唔止係全office最後生嗰個，同時亦係全office最受歡迎嗰個。
師奶同阿叔同事平時會用「靚仔」嚟稱呼我，好少直接叫我個名，印象最深刻係last day當日，有個師奶同事咁樣講：「你真係走呀？唉！全公司得你睇得下，以後公司冇靚仔喇！」
人類始終係膚淺，邊個唔鍾意聽讚美說話吖！呢位師奶同事講嘅嘢我記到而家。
正所謂人望高處，公司喺灰窰角街呢啲工廠區加上得18個人，我當然希望轉去出面嘅大企業發展啦，何況呢份畢業後嘅工作一做就做咗3年半，算係咁喇啩！
仲記得返新工嘅第一日，一齊坐電梯嗰陣仲有兩個男仔，佢哋有互相打招呼，明顯係認識，更巧合嘅係，大家一樣撳10樓，換言之肯定係我新公司嘅同事，不過有樣嘢令我好唔舒服，因為呢兩個男仔起碼190以上，我都180啦，夾喺佢哋中間好似個小矮人一樣。
唔知呢度有冇NBA迷，以前有個名宿叫史托頓（John Stockton），嗰陣我睇返經典片嘅時候，成日以為史托頓好矮，因為佢真係場上最細粒嗰個，後來check返先知史托頓都成6呎1吋，全因為身邊啲隊友更加高，所以佢置身其中先會似小矮人。
或者喺以前讀書、舊公司，仲有朋友圈子當中，我永遠係最高嘅一個，所以當時被兩個更高嘅人夾到變小矮人，感覺硬係怪怪地，好唔想企佢哋隔籬，雖然後來知道呢兩個男仔唔係我嘅department，不過我嘅日子並冇好過，因為同部門有4男1女，4條仔都係介乎185至195cm嘅身高，我依然係最矮嗰個……
咁都不特止，同部門呢4條仔嘅顏值先係重點，如果我做藝員可以去到二線頭一線尾，我諗佢4個肯定係一線，就算唔係一線，都必定係嗰種會被力捧嘅新人。
然後我再發現，呢間公司好似有鋪請「高人」嘅癮，除咗第一日返工電梯撞到嗰兩個男仔，仲有我部門另外4條仔之外，office裡面身高超過185嘅大有人在，當中過半數都好型，個別更加可以用「超靚仔」嚟形容，出生以嚟我第一次覺得自己咁矮同埋咁平庸。
其實公司啲女仔都唔弱，唔係講身高，係講樣貌，可能真係中環靚女多，反正係匿名投稿，我都唔怕認，office裡面有3分1嘅女仔我都追過，但係全部失手，對於冇戀愛經驗嘅我嚟講，自信心簡直係跌破最低點。
感受最深係我做咗半年之後，向同team嗰位女同事示愛，我趁Happy Friday send咗段WhatsApp msg畀佢，呢位女同事隔咗兩日，即係星期日先至回覆，相信佢都諗咗好耐應該點reply：「雖然你唔靚仔，不過你真係好nice，我暫時唔想拍拖住…..」
我睇完第一句之後已經唔想睇落去，自出娘胎以嚟，第一次有人兜口兜面話我唔靚仔。後來我又追另一位女同事，今次我唔敢直接示愛，轉咗用一種自嘲方式去表達，我係趁公司gathering嗰陣，跟埋佢出餐廳門口煲煙。
當時我向呢位心儀嘅煙鏟女神講：「點呀你？好似好攰咁喎！其實我都有少少攰，不如一陣我送你返去吖，頭先我見個女侍應主動問Derek抄牌，靚仔真係無敵，我呢啲醜男企喺佢哋隔籬完全被無視呀！」
通常一個人自嘲，最希望遇到嘅情節係聆聽者向你講呢句：「邊會呀，你都唔係咁差啫！」
但煙鏟女神對住我咁講：「咁每個人都唔同㗎嘛，你唔靚仔啫，都一定會有其他優點嘅，呢個世界好公平。」
冇錯，佢唔係反駁我，而係直接安慰我。
再後來，我開始意識到自己追過咁多女同事都失手，其實唔關高度事，亦唔係因為其他男同事好似model咁靚仔先將我比下去，而係我本身真係幾樣衰。
因為舊公司「重女」，剩低幾個都係阿叔阿伯，作為碩果僅存嘅唯一一個後生仔，幾個師奶同事讚我靚仔，我真係以為自己靚仔。
讀書嗰陣好多同學仔都好薯，唔識打扮，我以為自己係全班最高嗰個就特別型棍，而家睇返佢哋出嚟做嘢之後變咗好多，個個舊同學都乾淨俐落，我先發現原來自己喺佢哋當中一啲都唔出眾。
喺公司更加唔使講，女同事對住其他擁有model身型同明星相嘅男同事總係心心眼，對住我嗰陣就永遠一句起兩句止，呢幾年我已經消化並接受咗事實。
自信心最低嘅時候我曾經同阿媽講：「以前比你同老豆讚得多，搞到我真係以為自己好靚仔，點知而家間公司啲男同事個個都高大有型，我先發現原來自己好樣衰，都係你哋啦，係又讚唔係又讚，搞到我有錯覺。」
我阿媽答：「個個父母都覺得仔女係最靚㗎啦！」
唔止父母，仲有街市賣豬腸粉個阿姐，仲有收垃圾個阿婆，佢哋都會叫我靚仔，後來當然知道係客套嘅恭維說話啦！不過呢班街坊好有禮貌㗎喇，平時返工同男同事出去食lunch，公司樓下茶記嘅侍應會笑住問佢哋食乜，下下都靚仔前靚仔後，當問到我嗰陣就會變晒語氣：「你呢？諗掂未？」
唔怕講件真事出嚟，因為幾乎係全公司最矮同埋最唔靚仔嗰個，喺度做實在太自卑，自卑到我考慮過轉工，咁當然都冇咁做啦，但我從來唔會將任何公司gathering嘅合照擺上社交平台，我唔想畀自己啲朋友見到，已經自卑到一個點。
以前我照鏡真係會覺得自己唔錯，某啲角度睇仲幾好，冇比較冇傷害，原來一切只係自我感覺良好，ok啦！我接受咗自己醜樣㗎喇，想問下大家又係幾時開始意識到自己樣衰㗎？麻煩靚仔靚女唔好答呢條問題，等我哋班樣衰嘅人自己交流下啦！（完）
靚仔又真係特別多著數嘅🤷🏻♂️
痴女迷戀求職者 揚言人工多一萬
https://hkofficedaily.com/?p=17043
唔要女 唔要30歲 要靚仔小鮮肉
https://hkofficedaily.com/?p=4466