老婆幫前男友打工 時間超短薪高糧準

老婆啱啱生咗小朋友,隔咗幾日就有架全新嘅BB車送上門,由於佢陀B嘅時候大家一齊做過research,所以我知道眼前呢部 iCandy Peach絕對唔平,上網再double check下,果然索價過萬,本身我諗住接收家姐嗰部二手BB車咋!

問清楚之後先知道,呢架BB車係老婆個老闆送嚟,幾幫得手嘅員工都好啦,老闆有冇可能送份咁名貴嘅禮物呀?最重要係我老婆只不過以freelance形式打工,成件事根本係超現實同埋超乎想像。

再問得深入啲,跟住就係一匹布咁長嘅故事,不過我想強調一點,就算有任何疑問都好,我同老婆始終係理性討論,一來我哋好少鬧交,大家都屬於理性嘅人,二來老婆生咗BB冇耐,佢懷胎十月生小朋友已經好辛苦。

老婆:「老闆係我以前男朋友,你唔好誤會,我同佢之間冇嘢,呢幾年都係遙距工作,連見面都冇。」

我同老婆拍拖3年,結咗婚1年,未一齊之前已經知道佢有個舊男友拍咗拖8年。

識咗我老婆之後,其實佢從未正式返過full time,一直以嚟都係做freelance,我亦冇問過佢咁樣做freelance一個月賺幾多,因為大家財政獨立,佢甚至唔需要我畀家用,我只係負責水電煤同管理費,而家住緊呢間居屋我一早供完,平時出街食飯我畀,如果老婆買餸亦唔會問返我攞錢。

我同老婆都係做design,佢平時會接job喺屋企做,我以為佢係接好多份job,但原來由始至終都係幫一個老闆做嘢,亦即係佢前男友。

我百份百信任老婆,因為正式結婚之前我哋已經同居,講真佢仲深閨過我,所以我絕對唔會諗咩「戴帽」,感覺怪怪嘅最大原因應該係……佢同前男友拍過8年拖,分開後仍然因為工作而keep住連繫,我多少有啲不是味兒。

我:「知道你哋之間冇嘢,佢肯,你都唔制啦!不過呢部BB車真係太大手筆喇。」

老婆:「佢到今時今日仲話自己欠咗我,還一世都還唔晒,我有叫咗佢唔使送,畀你睇下啲WhatsApp對話,我哋真係冇嘢㗎!」

老婆遞埋手提電話過嚟,跟住就入房睇BB,我口講唔使,但最終都有睇,因為我覺得有心結不如直接解開,總好過估估下影響感情,我係咪太過小男人呢?

佢兩個嘅對話以工作為主,間唔中會講笑吹水,但一句起兩句止,頻率亦唔高,老婆有提及自己大肚未必跟到啲job咁貼,佢前男友兼老闆就話唔緊要,最震驚就係每月一次嘅入數紀錄,我發現老婆freelance嘅人工係我份全職嘅兩倍,仲要好準時每月25號過數,每次過完數就有一張截圖。

我直接問老婆點解咁高人工,因為佢平時嘅freelance工作講真都幾輕鬆,工作量絕對唔多,亦睇得出唔趕。

老婆:「以前佢好窮㗎,特別係拍拖初期,其實我成日借錢畀佢,講樣嘢畀你聽,不過你唔好嬲喎,嗰陣時我仲試過幫佢借loan,或者我真係好鍾意佢啦!過咗去喇,而家我係一啲都唔鍾意佢㗎,你唔好亂諗。」

我:「你幫佢借loan?咁佢有冇還?」

老婆:「佢有試過遲還㗎,嗰陣時係我嘅名義借,人哋直接喺我戶口扣數,但後來佢已經還返晒畀我,放心喎,我同你未一齊之前佢已經還凸。」

後來呢個前男友終於生性,事業方面亦都大躍進,甚至有自己嘅公司,但老婆話大家嘅感情已經變得好淡,因為當中夾雜無數嘅失望。

佢哋分手冇反面或者大吵大鬧,典型嘅因了解而分開,加上兩個人前前後後認識超過10年,即使唔會好似以前咁close,但真係再見亦是朋友。

我:「你覺得佢仲係咪鍾意你?」

老婆:「佢出面好多女,呢幾年都換咗幾次畫,佢只係覺得以前虧欠咗我,成日話最窮嘅時候有我陪佢捱,仲浪費咗我咁多年,其實諗諗下可能係我當年剋住佢都唔定。」

幾年前老婆失業,前男友知道後就叫佢幫手做freelance,人工仲要係出面full time市價嘅兩倍,坦白講真係明益我老婆,從經濟角度嚟講當然係好事,但我喺心理上又有少少唔舒服,想問下大家,如果相同情況發生喺你哋身上,你會選擇釋懷,抑或叫老婆唔好再幫呢個前男友做嘢呢?其實作為老公又應唔應該介意呢?(完)

唔知大家覺得投稿人老婆呢份freelance筍唔筍,但講到easy money我就諗起以下兩份兼職:

出trip住酒店驚鬼 請freelance陪瞓
https://hkofficedaily.com/?p=12856

吹到公司有50人 老細請臨記扮返工
https://hkofficedaily.com/?p=18438


error: