印象中公司以前係炒過人，其中一個係佢自己搏炒，連續曠工幾日唔見人，後來好似話係搵到第二份工，唔想等一個月通知，所以諗到呢條失蹤嘅屎橋，另一個就係同部門上司鬧交，喺office裡面爆晒粗，但我喺度做咗7年半，真係歸類為炒魷嘅就得呢兩個。
以上兩位被炒同事本身都做咗一段時間，而最近有個新同事就犀利好多，呢個女仔只係用咗45分鐘就被解僱，破咗公司最快炒人紀錄。
45分鐘係計多咗，其實嗰日返工佢已經遲到20分鐘，遲到唔係咩大件事，但第一日已經咁樣就有啲過份，佢行入嚟我哋個部門嗰陣，第一句說話唔係say sorry，而係講咗句：「乜原來呢度有阿差㗎？」
呢個新女同事一開波就衰幾樣嘢，第一，就算你唔講咩原因遲到，係咁易講句唔好意思都好合理啫，第二，坦白講其他同事連你叫咩名都未知，係唔係應該介紹咗自己先呢？Receptionist帶佢入嚟之後招呼都冇打，真係同你好熟咩？
佢嗰句「乜原來呢度有阿差㗎？」就更加冇禮貌，公司的確有兩個印度同事，我哋唔係玩政治正確，但都麻煩你尊重下人，唔好叫人阿差，好在兩個識廣東話嘅印度同事聽唔到咋，呢啲真係典型嘅口沒遮攔，知唔知咩係尊重呀？
阿姐塊面都黑黑地㗎喇，冷冷地問咗句：「你做乜咁遲？」呢位新女同事就答：「頭先塞車。」仍然係冇表達過歉意。
不過阿姐都冇得怨人，呢條女係佢有份in，阿姐要怪就只能怪自己眼光唔好。
我被指派去教呢位女同事點樣登入公司個system，再同佢講解下個system啲嘢點樣撳同埋有咩要注意，咁嗰陣時佢都有聽有問，算係正常嘅，講講下呢條女就喺手袋度拎個盒出嚟，佢一路聽我講嘢一路拆開，其實我冇理，不過佢就自己介紹：「呢個香薰係男朋友送畀我，獎勵我搵到工。」
我：「你擺喺公司呀？唔係打算喺度點香薰呀？」
新同事個香薰係上面有個兜落油，下面有個窿擺扁身蠟燭，好原始就咁點著燃燒嗰款。
與此同時，老細走咗過嚟搵阿姐，原因係有客投訴啲貨期出問題，單嘢我有份跟，所以我都行埋去睇下有咩幫到手。說時遲那時快，新女同事嗰邊傳嚟撻火機嘅聲，由於老細同阿姐研究緊貨期單嘢，得我注意到，本來想喝出去嗌佢唔好點火，又怕會驚動到老細，但我唔出聲都有另一位同事出聲問佢：「你做乜點火？咩事呀你？」
呢個時候，新女同事原來已經加晒香油再點埋蠟燭burn佢個香薰🤦🏻♂️
阿姐仲大反應過老細，離遠向新女同事大喝一聲：「搞咩呀你？」
新女同事好愕然又意識到瀨嘢咁嘅樣，其實佢點火之前都應該要意識到瀨嘢啦！正當佢轉身想講嘢定唔知解釋嗰陣，一嘢就撞跌咗成個香薰……
因為啲精油倒瀉喺枱，再加埋跌出嚟嘅蠟燭掂到，成個枱面突然出現一片火海，都幾大面積，佢隔籬左右嘅女同事起身彈開，有啲男同事就因為唔知倒瀉香薰，所以係咁話要救火，我以為拍緊烈火雄心，而老細就企定定喺度呆咗。
可能精油並唔多，最後根本唔需要救火，過咗10秒8秒左右，嗰堆火係自己熄咗，我估最好彩係新同事個位之前冇人坐亦都冇擺文件，否則燒著紙張應該就唔同講法，anyway，總之呢場「火災」唔使救就自己熄晒。
火係熄咗，但阿姐已經怒不可遏，相信遲到加埋嗌同事做「阿差」都扣咗好多印象分㗎喇！老細望到眼前呢幕就問咗阿姐一句：「邊個嚟㗎？」
阿姐答：「新同事。」
老細亦回得簡潔：「炒咗佢。」語氣好平淡，純粹畀指令。
稍稍意外嘅係，阿姐叫新同事執嘢走，再講埋人事部會出夠一日人工畀佢之後，呢位新女同事並冇反駁或者任何唔願意，只係「哦」咗一聲就去執嘢，然後人事部已經有人行埋去協助，我望過自己隻錶，當時係9:45分，45分鐘就被解僱，如果計埋佢遲到，基本上25分鐘就講bye bye，相信呢個「極速傳說」除咗前無古人之外，睇怕亦都後無來者。（完）
公司炒人有好多不同情況，唔一定次次都係員工問題。
老闆炒人要求7折出糧 員工照要但告勞資審裁
https://hkofficedaily.com/?p=14348
太子爺大清算 得罪佢嘅人一個不留
https://hkofficedaily.com/?p=14607