台妹公開處刑「工具人」嗰個post（即係「兵」），身邊有好多朋友都走咗去朝聖，佢表面上幫隻兵徵女友，但其實邊會有其他女仔接受自己男友係人哋隻兵吖，台妹呢個post唔止矯情，仲好殘忍。
（編按：為免有讀者唔知道發生咩事，以下將台妹公開處刑「工具人」嘅post截圖。）
當大家都替呢隻兵感到不值嘅時候，我就喺度諗：「你哋班人覺得慘咋喎，隻兵可能好enjoy㗎喎！」之所以咁講，係因為我以前公司都有一隻兵，呢隻香港兵就好enjoy喇！
阿恆本來係一個正正常常嘅男仔，直至某日公司有個新女同事返工就變晒，嗰條女叫子珊，姣婆一名，日日返工低胸黑絲，阿恆從此被深深吸引，嗰啲換水搬嘢整電腦嘅老土情節全部做齊，連老細交畀子珊嘅data entry工作都幫手做埋，所以條女大部分時間都好得閒。
子珊有時會同阿恆單獨食lunch，有時就會跟大隊同我哋食，最搞笑係我哋發現阿恆會幫子珊畀錢，係每次都畀錢，有同事話阿恆大細超，佢會好自豪咁回應：「吹呀！我鍾意請我女神食呀！」子珊條姣婆亦唔會避忌，好似由得全世界知道阿恆係佢隻兵。
如果我哋喺度都照幫條女畀錢，即係平時佢兩個食都係阿恆埋單啦，唔記得講，阿恆仲會朝朝買早餐畀子珊，有時就咁三文治，有時麥記，有時就係咖啡牛角包，子珊例牌晏返，一返到坐低就好自然拎上手食，換言之應該係每朝睇心情再叫阿恆去買，做兵啫，使唔使星期一至五包晒早午餐呀？
後來公司又請咗條新仔，高高大大幾好樣，子珊嗒晒糖係咁姣人哋（有人見過佢兩個放工去棉登徑飲嘢，應該有下文），當時子珊有少少疏遠咗阿恆，阿恆成個人落晒型，但依然默默留守喺子珊身邊。
之後靚仔同子珊應該係情海翻波，喺公司迎面行過都唔打招呼變陌路人，阿恆竟然走去教訓靚仔，問人哋做咩搞到子珊唔開心？靚仔一企起身，高阿恆成個頭，劈頭就講咗句：「關你L事呀？」
阿恆笠水，敗走。
子珊同靚仔散咗之後，靚仔冇幾耐就resign喇，而子珊又好似以前一樣同返我哋成班人食lunch，我人生中最難忘嘅一幕亦出現咗，某日lunch time大家喺餐廳門口等緊位，子珊無啦啦：「殊～殊。」我哋班同事望埋去，心諗殊咩呀？係咪見到邊個呀？原來佢係殊緊阿恆，當阿恆get到嘅時候，子珊向住佢指一指自己隻鞋，示意鞋帶甩咗，包括我在內嘅幾位同事仲係一頭霧水之際，阿恆單膝跪下，唔係求婚，係自動自覺幫子珊綁鞋帶，綁完，起返身，成個過程一氣呵成，好明顯唔係第一次。
阿恆完全唔會覺得難為，因為除咗綁鞋帶之外，佢仲會幫子珊拎手袋，拎手袋喎，女同事咋喎，你都未必會幫女朋友或者老婆拎手袋啦！
或者你會話：「可能阿恆真係守得雲開見月明呢！」我有一刻都咁諗，所以睇完台妹單嘢之後，我就去search下子珊嘅facebook，內容見唔到，因為冇add friend，但頭像就係一張大肚沙龍相，有個男人摸住佢個肚，正路係老公啦！即係「子珊結婚了，新郎不是阿恆。」
跟住我又再search阿恆facebook，搵唔到，WhatsApp個舊同事問，佢話阿恆依然好迷戀子珊，上個月先買咗啲金器，話要送畀子珊個BB，要做契爺喎！所以呢，兵仔嘅思維，一般人係唔明㗎喇，由得佢哋啦！
你說阿恆太瘋癲，阿恆笑你看不穿！
投稿讀者：點只兵兵
🥸 做兵又好，追女仔又好，其實你點追女仔，就會吸啲咩女仔埋身，有冇睇過以下呢個post？
https://hkofficedaily.com/?p=9987