同家姐前男友拍拖3年 而家想結婚唔敢講

我而家個男朋友阿Joe,係家姐嘅前度男友,其實我哋不嬲都好熟,因為家姐之前拍拖會成日帶阿Joe返嚟,我亦經常做電燈膽,同佢哋出街睇戲食飯。

3年半前,佢兩個突然話分手,家姐指阿Joe冇上進心,又冇計劃結婚,雖然家姐冇呼天搶地,但明顯唔開心同埋落晒形,從語言中亦feel到佢同阿Joe係不歡而散,因為爸爸媽媽都有問起,家姐就一五一十講晒出嚟,做父母嘅一定心痛自己個女啦,何況家姐當時都30歲,係適婚年齡。

我嗰陣真係唔捨得家姐同阿Joe分開,始終我哋三個成日一齊玩,有好多難忘嘅回憶,感情好好,我已經認定阿Joe會做我姐夫,所以感覺係突然冇咗一位親人。

我當時私底下聯絡阿Joe,想睇下有冇得救,或者會唔會係一時衝動,結果阿Joe就向我吐苦水,解釋自己嗰幾年同家姐拍拖有咩問題,例如佢唔係冇上進心,只係希望循序漸進,唔想因為家姐講幾句就轉工。

至於家姐話佢冇計劃結婚,阿Joe亦冇否認,原因係未想結就係未想結,唔想30歲趕結婚係一項任務。

嗰陣成日同阿Joe傾計,講下講下就話不如出嚟食飯先傾,大家開頭真係冇嘢,但傾傾下,我又會講自己嘅事畀佢聽,例如工作上有咩唔開心。

久而久之,我同佢差唔多日日傾計,隔一至兩星期就出嚟食飯,兩個人喺呢段時間建立咗好微妙嘅感情,最後阿Joe問可唔可以喺一齊?我都知瀨嘢,背後幾廿個問題未解決,但一個人動咗情就係動咗情,我同阿Joe好任性地選擇開始。

我哋兩個不斷說服自己,又唔係去偷,又唔係去搶,阿Joe同家姐當時已經乾淨地分咗手,唔涉及任何撬牆腳或者一腳踏兩船嘅問題,我哋點解唔畀自己追尋幸福呢?

每個人都試過拍拖,當中嘅衝動唔使多解釋,何況我嗰陣只係25歲。拍下拍下,咁就同阿Joe喺埋一齊3年。

我有扮晒嘢再喺家姐同爸爸媽媽面前提起呢個人,例如電視唔知播咩講緊昂坪360,爸爸無端端話想去,我即刻搵位入:「之前咪去過囉,我哋一家同埋阿Joe吖嘛!唔記得喇?」

點知家姐好大反應:「唔好再提呢個人,聽到就心情唔好。」

媽媽隨即打眼色叫我唔好講,爸爸都唔敢出聲。

最近阿Joe同我講想結婚,其實我好感動,當年佢因為唔想結婚先同家姐分手,而家竟然主動提出,阿Joe話自己呢幾年成熟咗,諗法唔同咗,想追求嘅嘢亦唔一樣,佢話多謝我一直以嚟冇迫佢,令佢好舒服,過去幾年可以盡情做自己鍾意嘅事,而家想同我組織一個家庭。

我當然想啦!問題係唔知點過屋企人呢一關,家姐仲咁反感,你都唔好奢望兩老會開放到畀個細女嫁畀大女嘅前男友,仲有一個重點-----家姐同阿Joe分手之後,其實一直冇拍拖,我曾經懷疑佢個心仲係鍾意阿Joe,但口硬唔肯認,不過我唔敢問。

家姐份工本身忙,同埋佢有班運動friend,所以我同阿Joe拍拖佢都唔會察覺,頂多見我大時大節出街就問句:「係咪有男朋友呀?」我一般會扮傻唔答。

如果我同阿Joe出街,的確會打聽下家姐當日行程,唔想畀佢撞到。(爸爸媽媽好少出街,唔係同區唔使避,係驚家姐。)

其實我同阿Joe都想勇敢面對,始終結婚咁大件事,唔通瞞一世咩,屋企人又唔會畀我搬出去,所以而家真係好驚,好想開口,又怕畀人鬧,我始終要近距離面對家姐,真心驚姐妹都冇得做,點算好?

error: