你點追女仔 就會吸啲咩女仔埋身─情侶座

我有個二世祖friend,之前喺朋友聚會當中識咗個新加坡妹,喺新加坡航空做空姐,記得當時佢話:「成間K房最靚係佢,好鍾意呢啲健康膚色嘅女仔,有啲似鍾麗緹嗰type。」

不過佢追咗好耐都唔成功,直到2018年聖誕節,我個friend買咗個YSL手袋,再影相send去畀個女仔睇,話本來想當係聖誕禮物,但係知道空姐喺大時大節應該忙過平時,所以唔使急,可以等到有時間先約出嚟攞。

我:「佢唔知你屋企有啲錢㗎咩?你哋話晒都係朋友聚會識。」

「佢唔知㗎,因為嗰次好多friend啲friend啲friend,我都唔知佢係同邊個friend嚟,咁先好,佢唔會因為錢而埋身。」

結果,個女仔話唔好意思,聖誕正日要飛,過幾日咁啱要去香港,到時先出嚟食飯好唔好?我個friend梗係連隨book埋餐廳,而故事嘅推進節奏亦都快咗好多,因為同一晚,個女仔已經上埋佢君臨天下嘅屋企過夜。

我嗰陣同佢講:「叫咗你唔好第一次就送咁貴嘅嘢啦!你點追女仔,其實就吸啲咩女仔。」

「佢唔同囉,個女仔完全唔介意我係二世祖不務正業,淨係識攤大手板問老竇攞錢,呢樣我有自知之明既,不過真係好感動,以前香港啲女朋友個個都嫌我廢,但係坡妹唔會。」

😂😂😂真係DKLM

拍拖之後嗰年,個女仔成日要佢買呢樣買嗰樣,我個friend又覺得冇問題㗎喎,仲話唔係送車唔係送樓,都係一啲手袋同化妝品之類,最貴只係隻勞力士,已經好慳家喎。

我:「慳家呢個詞語唔係咁用㗎喎!你啲手袋個個都幾萬蚊一個。」

當然,我個friend係完全聽唔入耳,總之處處為坡妹護航。

上年年中開始,佢老竇啲生意好差(做飲食業),開始要賣返啲資產套現,我個friend本來一個人住君臨天下,最後要搬返去同屋企人住,放返間屋出嚟,個坡妹開始問長問短。同一時間,佢老竇要再收緊支出,平時唔放在眼內嘅開支都要管喇,見個仔碌卡碌得好狼,仲收返啲附屬卡,所以我個friend唔可以再買手袋畀條女喇。

「其實坡妹好關心我屋企㗎,啲財政狀況問得好清楚,佢又唔係做會計,但係都要幫我計數,呢啲女仔邊到搵呀?」

哦,你話係就係啦。

上個月,坡妹話要同佢分手,仲要係WhatsApp分手,我個friend打返去問咩事,不過已經冇人聽喇,成個月都搵唔到人,然後佢好沮喪咁問我點睇?

我答:「佢應該係覺得男人要以事業為重,希望你全心全意返去幫老竇將啲生意重回正軌,唔想你分心,真係一個好識得為人著想嘅好女仔呀!」

#個friend話我潤鳩佢
#一早提咗你啦死蠢

error: