老細阿Sam忽然正視公司收入問題，開業接近半年先知道每月淨利潤唔夠cover一個員工份糧？我心入面不禁問咗句：「你瞓咗幾耐呀？」
Sam：「唔……咁落去唔係辦法喎，搞個App吖我哋。」
我：「仲搞個App？起碼10至20萬喎！」
Sam：「都冇辦法㗎，有App嘅話，啲人買嘢方便啲吖嘛！」
我：「其實就咁去我哋網頁買都得啦，同埋整完個App如果冇人download好老尷。」
Sam：「唔理喇，搵人整咗先。」
阿Sam嘅性格就係咁，二世祖嘅後台實在太硬淨，使錢唔需要根據實際情況考慮，所有數據同帳目對阿Sam嚟講，比不上佢剎那間嘅心血來潮。
真係搵人寫App，真係要6位數，但係公司呢段時間嘅生意始終未見好轉，阿Sam間唔中仲有朋友上嚟公司坐，講多兩句佢就送啲貨畀人，我私底下問過阿Sam點解唔收錢，就算唔賺，拎返個本都好吖，佢話唔好意思喎！問friend拎返錢好冇面。
肥妹同事Anne對公司最唔睇好，咁又難怪嘅，何況女仔睇數字始終敏感啲，Anne自己都不斷拎緊公司著數，買廁紙、文具、盒裝紙巾、藥、茶包……呢啲濕濕碎碎嘅公司物品，竟然訂多一份拎返屋企，佢嘅口頭禪係：「遲早執㗎啦，老細又唔志在。」
Anne又同阿Sam講要讀書，每星期有3日要早一個鐘走，即係5點收工，阿Sam份人好易話為，Anne有持無恐，我忍唔住問Anne讀咩？佢答我只係工聯會啲興趣班，仲要一星期返兩晚，每次個半鐘，反正留喺度幫唔到公司，無無聊聊不如早啲收工行下街先返工聯會。
呢啲就係所謂嘅士氣問題，Brian開始有樣學樣，因為佢有一種心態～～～「Anne都攞緊著數，我守規矩咪好蝕底？」由於阿Sam自己都係日日遲到，次次都係lunch之前先至返工，所以Brian亦唔執輸，朝朝11點幾先至返，然後喺度打埋啲手遊game，再唔係趁阿Sam出去就瞓覺，每日實際工作時間絕對冇兩個鐘。
我唔係扮正義之師，亦唔係站於道德高地，我只係想呢間公司可以長遠發展，唔好執笠，咁份糧先可以長賺長有，難得有個老細不拘小節，office環境又咁輕鬆寫意，你求神拜佛都想間公司run落去啦，點解唔諗得長遠啲呢？
雖然我哋未必可以將online store起死回生，但都可以畀阿Sam見到我哋嘅士氣吖嘛，你呃埋啲返工鐘數、紙巾、茶包，會唔會太短視呀？
阿Sam自己都唔爭氣，每日都係lunch前先至返office，一返嚟就吹大雞食lunch，作為老細對住自己壇生意都咁樣，仲要蝕緊錢㗎喎，員工冇鬥志又可以怪邊個呢？
阿Sam：「各位，食唔食lunch buffet？」
Anne：「食呀！」日日免費lunch，你咩都食㗎啦，仲要係buffet。
去到坐低咗食lunch buffet，阿Sam突然講：「做埋今個月唔做喇，我會另外補多一個月糧畀大家，呢個月你哋盡量幫我執埋啲手尾吖。」
猝不及防，即使大家都預咗有呢一日，但係會唔會太突然呀？Anne同Brian一時三刻都接唔到。
我：「明白嘅，公司生意係冇預期咁好，不過之前咪搞緊個App嘅，唔要呀？畀晒錢㗎喎！」
Brian：「係囉係囉，會唔會run多一排試下反應先呀？」
Sam：「唔試喇，其實我都冇咗熱誠，諗諗下真係冇得做，個App用咗十零個啫（十幾萬），而家cut好過再蝕先至cut，我另外同個friend搞間室內Golf練習場，幾正㗎，有埋餐廳仔。」
Anne：「室內打Golf？有冇得請埋我哋過去呀？」
Sam：「我都想，不過嗰邊係要trainer同埋餐廳侍應為主，始終係門市嘛。」
就係咁，我哋公司正式宣布收皮，二世祖老細嘅特性就係隨心同即興，唔按章法出牌。
Anne同Brian喺最後一個月冇特別搵工，繼續hea足每分每秒，佢哋話懶咗太耐，好難突然開turbo喎。我就比較著急，幸運地喺呢個時候搵到份新工，中間仲有一個星期空檔，可以整理下心情。
阿Sam後來帶我哋三個同事去佢間咩Golf室內練習場兼餐廳，我唔知佢呢檔新嘢掂唔掂，不過無所謂啦，反正投資6位數同7位數，對阿Sam嚟講仲係濕濕碎，正如佢自己話齋，老豆啲生意係政府工程，有幾層樓，又有工廈，全部買斷晒，就算而家即刻退休都可以搣成世。
之後我去咗一間好平凡，好傳統嘅公司返工，老細係紅褲子出身，即係由基層做起，白手興家開公司做生意，同阿Sam完全係一個極端。
喺呢間新公司，人工唔再由我開價，但感謝阿Sam，因為佢之前嘅慷慨，我嘅last salary高咗，叫價可以比之前進取。新公司好多嘢都有規有矩，訂多樣文具都要填form，mouse壞咗都要畀IT左check右check先可以換個新。
呢個紅褲子出身嘅老細咩都睇數據，要追KPI，從來冇請過同事食lunch，不過坦白講，呢份工真係好穩定，起碼唔會突然執笠，又或者突然成間公司轉方針，唔會有啲project做做下放棄，悶係悶啲，但個心都定啲。
阿Sam呢種二世祖老細，為人爽直，不過佢心情同埋諗法經常轉變，而且冇制定任何長遠計劃，無可否認你跟著佢會搵到快錢，但就好難長久。
人生跟過一個咁率性嘅二世祖老細，其實都係開心同難忘嘅經歷，而家人大咗追求穩定，我偏向做一間務實嘅公司。
希望阿Sam之後做咩都順順利利，雖然有錢啫，都唔好成日畀人呃吖嘛！我同佢已經冇聯絡喇，一個多錢嘅人，絕對唔愁冇朋友，可能佢又遇到真心嘅人呢！
《我老細係二世祖》 完
－
《我老細係二世祖》1
觀塘Office乜都冇，得張波枱離晒譜
https://hkofficedaily.com/?p=16500
《我老細係二世祖》2
錢多事少冇嘢跟，返工玩樂過日辰
https://hkofficedaily.com/?p=16510
《我老細係二世祖》3
屋企有錢唔通唔要呀？
https://hkofficedaily.com/?p=16517