問同事取飯錢被諷幾廿蚊都追:你有冇咁窮呀

Hello我叫Shadow,想分享一件喺辦公室發生嘅事,早幾日食lunch,有個女同事安安話唔記得帶銀包,問我借咗張八達通嚟「Do」飯,雖然呢啲嘢好平常,但係安安返到office之後並冇畀返錢我,我亦都係隔咗幾日先開聲問佢拎返錢。

估唔到安安反應咁大:「你冇嘢呀?幾廿蚊都問返我攞,下次食飯我出返咪得囉!派咗消費劵喇喎,你有冇咁窮呀?」唔知佢係咪刻意提高聲量,定係我自己太在意,附近幾個同事都擰晒過嚟望住,坦白講,我當時覺得好委屈。

雖然lunch嘅地點只係普通連鎖式快餐店,八達通「Do」嘅銀碼亦只係40幾蚊,但唔通銀碼細就唔使畀返人?唔通銀碼細就唔應該追返你拎?我認我係窮,不過窮係罪咩?就算我好有錢,咁就代表要出埋你嗰份?

正當我覺得好委屈好尷尬嘅時候,有個比較senior嘅男同事竟然代我開口還擊,佢向住安安講:「係咪下餐你幫Shadow出返先?咁就要去半島酒店食lunch buffet喇,橫掂隔兩條街之嘛!」

安安心急反駁:「咩半島buffet呀,頭先食快餐店咋,我爭Shadow幾廿蚊咋!」

Senior男同事:「頭先你話下餐你畀返吖嘛,如果下餐Shadown帶你去半島,咁咪下餐囉,哦,原來係計銀碼唔係計下餐,超!以為你咁豪添!你都有消費劵㗎喎,請埋我哋食餐好啦!」

安安:「傻傻地,做咩要請你。」然後安安就死死地氣喺銀包摷咗張$50蚊紙畀我,仲大大聲話唔使找……

真係多謝晒,你餐飯$48,唔知以為你畀$200貼士我,結果我梗係擺返$2喺佢枱面啦,唔想欠佢。

好感激嗰位senior男同事「拔刀相助」,亦都好佩服佢份人夠guts乜都夠膽講,呢樣唔關senior定係junior事,佢嘅優點正正係我嘅缺點,因為每個人嘅性格都唔同,首先我反應唔夠快,真係冇諗過借錢畀安安食飯,問佢拎返錢會被寸:「幾廿蚊都問返我攞?你有冇咁窮呀?」我都唔明點解會講得出口,人無恥果然係無敵。

其次係,就算我反應得切,都會因為自身性格問題而唔會開口鬧返對方,或者有人會將呢種厚道美化為修養,但我知道自己其實係懦弱,我會顧慮好多嘢,例如真係開口鬧返對方轉頭,之後喺office撞口撞面會唔會好尷尬,你一句我一句咁鬧嚟鬧去,又會唔會令其他人覺得自己好小家?其他同事又可能當睇戲食花生……太多呢啲無謂諗法,我不得不承認喺性格上係怯懦。

不過最令我大開眼界嘅係,原來忍讓並唔一定會換嚟尊重,當日臨放工嘅時候,我畀安安喺WhatsApp group移除咗……

嗰個WhatsApp group唔係講公事,純粹係安安create出嚟,for幾位經常一齊食晏嘅女同事傾下lunch time去邊間餐廳,的確係幾無聊,但公司同事之間就係有好多呢啲大大小小嘅WhatsApp group,其實我好少喺個group講嘢,當初亦只係安安add咗我入呢個群組。

「安安removed咗你嘅?唔係咁小器呀?定係錯手咋?」我本身做緊嘢冇為意,反而係group裡面其中一位女同事話返畀我知,當然,我並唔覺得可惜,只係估唔到安安嘅做法咁肉酸啫。

儘管我份人性格比較懦弱,但唔代表我犯賤或者冇腦,呢件事上面我冇錯,安安呢種人如果係出面啲朋友,直接絕交仲好,可惜佢係同事,工作上點都有啲位要交接,而家佢將我移除出去個食lunch群組,我開心都嚟唔切,終於唔使同呢啲人食晏,仲唔使自己quit group,我亦唔需要背負小家嘅形象,幾好!(完)

最新一集《辦公室日報》介紹日本嘅介護工作,門檻相對較低,外國人大歡迎,究竟背後嘅原因係乜?如果未睇嘅朋友可以喺度直接觀看。

YouTube video
error: