調解欠薪糾紛 老闆指員工應付責任

僱主同僱員發生勞資糾紛而鬧上勞工處,勞資關係科辦事處就有機會出動調解員消除雙方嘅分歧,雖然話大部分個案最終都可以解決,但係上得嚟開會又點會咁順利吖,火爆場面間唔中會出現,有一兩次仲差啲見到佢哋講手。

上年大約年尾嘅時候,我處理過一個case都幾深刻,個老闆拖欠幾個員工總共兩個月嘅糧,最初嗰陣仲有計傾,老闆死晒狗講sorry,又叫員工體諒下,話公司周轉唔嚟之類。

當中有一位員工特別辣,講明限期前唔出糧就罷工同埋搞大件事,結果個老闆真係出咗畀佢先,其他比較溫和嘅員工反而無份,此舉好明顯係擺平最麻煩嘅人,有商量同埋態度上仲會體諒嗰班就hold住先。呢種係日常生活都會見到嘅人性,有冇試過抵得諗捱義氣,結果人哋咩都旨意晒你?又有冇見過喺餐廳好聲好氣叫侍應落單或者提供服務但被冷待,反而有啲客一嚟就聲大夾惡好麻煩,侍應對住佢哋會不敢怠慢?道理其實同出一轍。

個老闆解決咗最硬淨嗰位員工之後,對住其他員工開始採取拖字訣,希望商討再遲啲出,又問可唔可以分期,後來連比較易話為嘅員工都沉唔住氣,畢竟最基本嘅問題係有汗出點可以冇糧出,唔使生活咩?

雙方喺會議上你一言我一語連珠炮發,老闆話自己壓力好大,淨係Office租金同埋人工已經吃不消,員工反駁:「我哋就冇壓力?我哋嘅生活就唔難過?」

老闆:「其實公司冇糧出,你哋都有責任,生意唔好,上上下下都應該一齊承擔!」

員工:「你講到欠薪好似天經地義咁喎!」

我望一望資料,眼前追討欠薪嗰幾位員工分別係HR同埋Admin,個老闆話佢哋有責任,我仲以為呢幾個係Sales跑唔到數,但即使跑唔到數,你都要出糧㗎喎!

老闆:「以前公司好景你哋就留低,而家都係兩個月糧啫,最多我咪按咗層樓出畀你哋先囉,咁都需要時間㗎!而家生意差反轉豬肚就係屎,點解要搞到又罷工又上庭呢?你要我嘥時間嚟呢度傾,不如畀我用啲時間籌錢啦!有冇諗過同公司同甘共苦㗎?」

員工:「老闆,我想問你一句,生意好嘅時候,你有冇特別出大份糧畀我哋?有冇特別出獎金畀我哋?首先,你冇,其次,我哋冇要求,所以你所謂嘅生意好嗰陣,錢係入你袋,我哋都係照正常嘅糧,而家生意差,我哋攞返合約上嘅人工都有錯?咁樣叫同甘共苦?」

我做過一單家事調解,男方因為有第三者而離婚,期間已經斷斷續續拖欠前妻贍養費,後來啲錢畀嗰位第三者呃晒,男方更加一蚊贍養費都唔畀,仲反過嚟話前妻唔體諒,指責前妻唔肯同甘共苦。

呢個世界有啲人真係咁,不肯同甘,卻想共苦,同我眼前呢位老闆好相似,你賺到錢唔會覺得係員工嘅功勞,但蝕咗錢就會認為係員工嘅責任。

我向老闆講:「有責任提醒一句,拖欠工資係刑事,根據《僱傭條例》規定,僱主須於工資期屆滿後或者僱傭合約終止後嘅7日內支付工資,如果僱主故意或者冇合理原因遲出糧,咁已經屬違法,一經定罪,最高可以被罰款35萬同埋監禁3年,而且僱主係要就欠薪支付利息,我嘅角色同責任都係幫你哋圓滿解決。」

每次搬呢啲條文出嚟,例牌會靜晒,因為雙方都要消化。

我繼續:「或者我舉個真實例子會更容易理解,之前有個僱主冇依照《僱傭條例》 規定出糧畀幾位離職僱員,其實涉及嘅款額仲少過你哋而家呢個case,不過勞工處完成調查後都向僱主作出檢控,最後上到法庭罪名成立,個僱主即時判監兩個月。」

僱主同僱員之間嘅感情只有佢哋自己最清楚,但係欠薪絕對冇灰色地帶,到期唔出糧係事實就係事實,後來個老闆知道唔係講笑,聽到要坐監就好快搞掂埋其他員工嘅欠薪,至於事件後續請原諒我冇喺呢度講,畢竟涉及咗一啲私隱同法律問題。

一間公司成功或者失敗有好多原因,不過作為有責任同埋有承擔嘅老闆,絕對要做好風險管理,永遠要有足夠嘅錢出糧畀員工,佢哋都有自己嘅生活同埋家庭,而且從另外一個角度睇,老闆都有需要預判未來業績,公司生意真係咁差,不如同員工好嚟好去,出足糧等對方離職再搵工,你養少個人負擔都細咗啦,總好過糾纏不清,生意又做唔到,員工又意難平。

任何關係都好,想對方可以共苦,首先要先問下當初有冇同甘。

error: