瑞士山區肺、補藥黨、動物傳心師，又或者係倫敦金呢啲騙案，相信大家都聽唔少，不過你又有冇諗過，原來去卡拉OK唱歌都可以跌錢？仲要大嗱嗱跌咗70萬咁多，我都唔知呢個算唔算新類型騙案，即管講出嚟等大家引以為鑑。
話說我公司有個阿姐級同事Susan，佢同另一位又係阿姐級嘅Connie成日結伴去唱K，其實佢哋耐唔耐都會叫埋我哋，但係唱過一次之後好多人都冇再去喇，唔係年齡歧視，而係大家唱嘅歌真係唔同年代，唔啱玩所以就無謂勉強。
有一日Connie返到公司同我哋講：「嘩，你知唔知Susan幾犀利呀，噚晚我同佢去唱K吖嘛，唱唱下突然有個30幾歲嘅男人敲門，以為係侍應啦，點知唔係喎，佢話喺門口聽咗好耐，聽到隻《傻女》覺得好好聽，想入嚟認識下唱呢首歌嘅人。」
咪玩啦，我都試過同Susan唱K，佢唱成點大家心中有數，嗰種懷舊腔真係……所以就算未聽完Connie講晒成個故事，又未見過嗰個男人係咩樣，我都已經斷定呢個男人相當有可疑。
不過其他同事聽完Connie講之後就開始起哄，仲叫埋「主角」Susan埋嚟講返件事，Susan個嘴角含春樣我到而家仲記得，唔知點解我忽然諗起一句說話，「上帝要你滅亡，必先令你瘋狂」，鬼叫Susan係阿姐級咩，大家一定唔會challenge，仲一個二個讚Susan好勁。
Susan邊笑邊講邊扮鎮定：「哦，都冇乜嘢吖，佢話以為係原唱陳慧嫻嚟咗，痴線！邊有咁誇張！咁佢又問可唔可以重唱一次畀佢聽喎，唔想喺出面隔住度門聽，咁我咪唱多次囉！」
最初我以為係溝女啦，不過你溝Susan都已經夠晒品味獨特㗎喇，點知劇情再突破啲。
Connie：「Susan講啲唔講啲，等我講啦，個男人話自己係和音公司職員，專責搵人唱和音、配音、幕後代唱，仲有唱嗰啲廣告歌喎，跟住畀咗張卡片Susan，想搵個時間試音，幾犀利呀！唱K都撞到個星探。」
聽到呢度，其實你只要有少少腦，都應該sense到係呃人啦，我有理由相信Connie骨子裡係好憎Susan，想推佢去死。
我：「係咪呃人㗎？」除咗我之外，仲有幾個同事聽完都叫Susan小心啲，不過Susan似乎有少少黑面，應該係覺得我哋質疑佢嘅實力。
Susan：「唔會啦！咁易畀人呃咩！我都會上去試音嘅，最多咪唔拎提款卡同銀包上去囉，有咩畀佢呃啫！」原來佢真係諗住上去試音……
講到尾，我哋都係同事啫，溫馨提示就畀咗喇，唔通阻住你去「追夢」咩，更何況你講到會收埋啲提款卡同信用卡先上去試音，咁咪good luck囉！
隔咗一排冇跟進，大家都淡忘咗，只係覺得Susan喺公司心情好差，郁啲就鬧爆佢班下屬，卒之Connie就八畀我哋聽，原來Susan真係畀人呃錢，佢當日上去人哋度試音，唱咗首唔知咩國語歌，對方話Susan國語咬字唔準，叫佢畀錢上國語堂，上完之後又話佢用聲要改善，又上咗個聲樂堂，然後又到咩造型堂，嘩～～～學海無涯呢個四字成語果然冇錯！
我：「咁最終即係畀咗幾多錢學費呢？」
Connie：「前前後後70幾萬！」
我：「70幾萬？點解呀？真係聞唔到陣味咩？好明顯係呃錢啦！」
Connie：「咁佢唔係一次過攞70幾萬出嚟嘅，學一樣就十幾廿萬，加加埋埋咪咁多囉，其實Susuan自己都有懷疑㗎，不過見之前畀咗啲，梗係想回本㗎啦，我都有勸過佢止蝕，但Susan又話學到啲嘢係有得著。」
我諗大部分人明知受騙都愈踩愈深，好大程度上都係有呢種心態，諗住唔畀都畀咗，放棄就一無所有，堅持就可能有返少少渣嗱，點知結果反而係泥足深陷，甚至一鋪清袋。
有同事想幫Susan，勸佢報警，有個仲叫佢走去報《東張西望》，點知Susan唔制，一來覺得瘀，二來想等多陣，睇下間和音公司會唔會派job畀佢，又話相信自己嘅實力，只係時機未到……
堅持追夢係啱，不過似乎係將嗰份理念用錯地方，如果Susan認清事實都仲好啲，但佢嘅問題係太有自信喇，希望佢唔好再不斷畀錢個老千啦，同時都想提醒多啲人，原來去唱K都會有機會畀人呃錢，呢首《傻女》真係好貴。
【辦公室性騷擾】配匙入女下屬屋企偷底褲 趁公司冇人聞高踭鞋
