老闆娘因為懷疑老闆同一位女職員有染，所以就返咗公司坐鎮，以後請人要畀佢先過目，五官端正一律唔會請，所以而家返公司就好似入咗怪獸樂園咁，我哋班男同事多得佢唔少。
講返老闆搭上女員工單嘢先，獨立去評論，老闆娘應該冇估錯，因為唔止一個同事撞見過，有人星期日見到老闆同呢位女同事喺尖沙咀某酒店high tea，據聞當時場面勁尷尬，老闆未食完個tea就埋單；又有人見過老闆車呢位女同事返工，仲要喺公司前一個街口落，以為冇人會見到。
其實除咗呢啲事之外，只要你唔係盲，絕對唔難察覺佢兩個狗上瓦坑有條路，嗰啲細微細眼嘅對望真係……唔識點形容，曖昧得嚟又帶點咸濕。
不過我哋做職員就冇咩資格評論，老細有錢有得玩女人，你吹佢唔脹㗎喎，至於嗰位女同事的確係索嘅，波大籮大，有啲女真係唔鍾意王子，鍾意王總㗎嘛，雖然佢哋起碼相差20年，但人各有志啦！
我貪順口啫，我老細唔係叫王總。
唔知老闆娘點解會收到風啦，公司就唔似有內應喇，應該係日常生活中察覺佢老公有古怪，而其實老闆沉晒船咁，我哋班職員仔都feel到唔妥，枕邊人聞到陣味好正常啫。
總之老闆娘某一日就返公司採取掃黃行動，無厘頭每日返朝九晚六，跟老闆車返工，同老闆食lunch，同老闆一齊放工，實行人盯人戰術，而其他時候你係唔知老闆娘對間公司有咩貢獻，全日行行企企，蛇頭鼠眼監視我哋班員工，男同事好啲，始終唔喺佢嘅監視清單裡面，其他女同事就話feel到有敵意。
我哋唔肯定老闆娘一早鎖定咗目標，定係返嚟觀察後先知道邊個係狐狸精啦！佢的確係對嗰位女同事特別唔客氣（可能係嗰位女同事亦係全office最靚）。
某一日，老闆娘叫咗「狐狸精」女同事入房，同老闆三個人閂埋門唔知傾咩，返出嚟之後「狐狸精」女同事就執枱走人，其他同事問佢咩事，佢話一早辭職，今日係last day喎！呃鬼食豆腐咩，都冇聽你講過，不過冇人追問或者篤爆，而佢始終冇害過我哋，何必連落台階都唔畀人呢！
之後要請返個人代「狐狸精」女同事，老闆娘親自in人，HR話佢應該係唔想請女仔，但唔方便講出口，所以見工會參與，唔好話靚女，只要你個樣四四正正都唔會請，結果請咗個40幾歲阿姐返嚟，個阿姐勁古怪，有時會紮孖辮返工，仲有人見過佢一路做嘢一路撩鼻屎，然後將啲鼻屎「hi」去自己個枱底，好核突呀！
後來有啲同事因為自己嘅原因離開，因為其中有條sales team都成日轉人，老闆娘係唔係都一齊interview，HR話覺得自己好冇面，老闆娘會問求職者一啲唔關事嘅問題，搞到成個interview好唔專業，總之公司請男仔佢係冇咩意見，但如果嗰期得啲女性求職者係掂，佢就一定要scan人哋個樣同資料先。
HR仲講過，有次請sales見咗一個女仔好ok，又有相關行業經驗，講嘢有禮又make sense，老闆娘事後死都話人哋唔好，原因係見個女仔條裙好短喎，驚見客會影響公司形象。
總之公司之後每請一個人，正確嚟講係每請一個女員工，都係一個比一個奇怪，除咗撩鼻屎「hi」枱底阿姐，佢仲請過一個200磅冇相關經驗嘅女人返嚟做sales，我唔係歧視肥妹，我女朋友都係肥妹，但肥妹都有好多種，可唔可以唔好請一個成身有陣怪味嘅人呀，全公司都聞到，全公司都避，你叫佢出去見客？你老公間公司遲早執笠㗎喎！
老闆娘仲請咗個超級大藍絲，其實藍黃唔係咩問題，一間公司咁大，好難全藍絲或者全黃絲，但係嗰個超級大藍絲阿姐堅係冇腦，早排開會走去提議全公司打科興，話唔抗疫好危險，如果唔係全部同事一齊打晒，返office會好易中招，其他人聽到之後梗係一齊屌佢啦！好在老闆娘自己都驚打咗科興會面癱，呢個藍絲阿姐真係癲㗎！
另外仲請咗個煙鏟中女，佢陣煙味勁過我老豆嗰啲老煙槍，我估佢一日食兩包煙，入晒骨嗰隻，啲牙黃過我底褲啲漬，好恐怖㗎個樣。
寫寫下都冇晒心機，每日返工好似入咗怪獸樂園咁，不過算啦，打份工啫，又唔係同佢做人世，何況而家個市道都唔敢轉工啦，咪唯有自己做自己嘢囉！
近呢大半年我愛自己個女朋友多咗，因為返完5日工之後，星期六日出去拍拖都覺得女朋友好靚。
投稿讀者：Jimmy