我同同事分享呢個麵包嘅名都有難度。
「知唔知邊隻公仔麵包？」
同事：「隻麵包有公仔？」
「唔係呀，即係炒麵包呀。」
同事：「麵包都要炒？你講咩呀？」
唉屌，真係好難表達，同埋我樓下間麵包舖仲要唔係用炒麵，佢哋係攝啲公仔麵落去，仲有一款攝印撈……
對我嚟講，麵、飯、麵包，係同一樣嘢，我指係配搭上，即係你會叫牛腩飯，但唔會叫麵包白飯㗎嘛！你一係齋叫炒麵，但你唔會叫炒麵加飯係咪？所以呢三樣嘢用途應該係一樣，攝啲麵落個包度，我真係覺得好奇怪吖嘛，叫佢個名都難啦！
「喂，唔該麵包吖。」
「嗱，麵包呀！」
「唔係呀，「麵」包呀！」
「咪麵包囉！」
「有麵嗰啲麵包呀！麵麵包呀！」
「係咪玩嘢呀？又係菠蘿包要有菠蘿啲friend呀？」
唔玩喇！正確嚟講係炒麵麵包（やきそばパン），發源地係日本，有典故㗎！（呢句我同自己講嘅）
成件事要追溯去二戰結束（Sorry扮緊專家，其實我都係上網綜合資料），當時日本水稻產量不足，大米係相當缺乏，據聞美國喺日本引入大量小麥粉，所以麵包就成為僅次於飯嘅主食，嗰陣麵包主要用嚟充飢，唔會整到而家咁靚，炒麵麵包就係咁樣興起，後期發展到將炒麵夾落麵包係一種昔日回憶。
網上指東京喺1950年已經有舖頭賣炒麵麵包，構思係始於有客人喺荒川區南千住一間野澤屋分別買咗炒麵同麵包兩樣嘢，不過個客鍾意夾住食，老闆基於貼心服務，每次都幫佢夾定，搞搞下就直接出咗隻炒麵麵包喇。
去到呢一代仲咁多日本後生仔同學生鍾意食，因為炒麵麵包出現過喺好多動漫裡面，日本甚至會將Lawson、FamilyMart，仲有7-11嘅炒麵麵包評分比拚，認真計算重量、麵嘅厚度、麵量多寡、尺寸，當然仲有口感味道，結果7-11同Lawson平分春色，FamilyMart包尾。
不過人哋日本就真係用炒麵，我樓下就用公仔麵，都算喇，喂你而家用印撈喎！真係唔怪得我卻步㗎！