我公司有個姣精女同事勁惡頂，佢以為我戴住earphone做嘢就聽唔到佢講咩，其實好多時我戴earphone只係唔想有人煩我，未必一定會播歌。
聽過姣精好幾次喺電話度氹男朋友買嘢，有次佢話：「WhatsApp send咗兩張圖畀你呀，你覺得邊個袋靚啲？啡色嗰個？啡色咪Celine囉！不過好貴呀，算啦！我個袋仲用得，都係唔好買住喇。」
雖然我聽唔到電話另一邊答乜，但係大致都估到，而且次次嘅套路都一樣。
「貴吖嘛，儲一年錢囉！你買畀我？唔好啦！傻佬，點可以用你啲錢，我自己儲，你賺錢都辛苦㗎嘛！真係唔使喇……咁呀，好啦！轉數快囉…都係唔好喇，太貴喇……好啦好啦！」
再隔一陣。
「收到喇，多謝你。我一陣同個friend去買，買完之後用嚟同你去街吖，到時畀你睇。」
同一種手段，同一種鋪排，絕對唔止一個Celine手袋，電話、電腦、化妝品，仲有啲美容療程，通通都係用以上形式嘅對話得到手，或者直接收現金過數。
當然我唔肯定呢位女同事係咪得一個男朋友啦！可能佢一腳踏幾船呢？人哋嘅事邊理得咁多。問題係佢喺公司都照姣男同事，隔離team有個男人就成日請佢食飯食下午茶，有時又會買一啲小禮物擺喺姣精枱面，真係見到都打冷震。
隔離team個男人知唔知道姣精有仔？無所謂啦！嗰個男人自己都有女朋友，所以係姣婆遇著脂粉客。
有次呢位脂粉客走嚟搵姣精傾計，內容真係正到無倫，姣精話：「公司啲女仔都唔同我玩。」
脂粉客：「點解呀？」
姣精：「可能唔鍾意我胸大。」差啲想笑出聲，但要扮聽緊歌，否則佢哋就會知我戴earphone都聽到。
脂粉客：「我同你玩囉！胸細嗰啲都係壞人。」救命呀！咁都講得出。
姣精個樣唔算出眾，不過真係波大，而且著衫好搏，裙就例牌超短，加上講嘢好嗲，拜倒佢裙下大獻殷勤嘅男同事唔止一個，有阿叔、有人夫、有戇直IT男，路線好多元化。
有次四個同事食完飯，包括我、姣精，仲有兩個男同事，經過間珍珠奶茶舖嗰陣，人哋做緊買一送一，我買完同個男同事A share一人一杯，佢畀返一半錢我，姣精就同另一位男同事B買，一句多謝就算，人哋義務請你飲咩！見到男同事A畀返一半錢我，佢仲要窒人：「你應該請埋Joyce啦，有乜理由要女仔出錢呀？冇哩風度！」男同事A勁尷尬想畀埋另一半錢，我即刻話唔使。
姣精仲好意思同男同事B講：「使唔使畀返一半你呀？」男同事B好enjoy咁話唔使，又話聽日再買畀姣精。
大家都係女人，我並非唔抵得人哋有著數，只係唔明白點解咁多男人受呢一套，更加唔明白點解有女人用呢種方式生存，由名牌手袋到珍珠奶茶，靠自己雙手同埋自己啲錢去買，唔係自在啲咩？
投稿讀者：Joyce