笠定頭盔先，我唔反對人哋信風水，只係呢行太多江湖術士，而我老細就偏偏信咗個神棍，搞到公司古靈精怪，又完全幫唔到手。
嗰個風水師係老細自己啲friend介紹，又話好準，又話好難約，要等半年乜乜乜，跟住有一晚老細突然打畀我：「Jennifer，喺邊呀？」
「仲喺公司。」
老細：「我朋友話個風水師有期，你而家幫我打畀佢吖。」
照老細意思打去約時間，妖！第二日已經可以上嚟office，又話好難約？我睇開個婦科醫生仲難book啦！
第二日風水師上到嚟，拎住個羅庚睇東睇西，又話reception要擺缸魚，又話個角落頭係財位，要放兩嚿唔知咩擺設，跟住某一個窗邊又係咩財星，要放一隻唔知咩烏龜（假嗰啲），另外pantry又點樣點樣影響健康，要擺個唔知咩盤，是但啦！重點都係嗰堆擺設要同佢買，總之睇一睇風水加埋啲古靈精怪嘢，埋單要十三萬幾……
其實我哋公司唔係好多人，上年話生意唔好要凍薪，所以老細先搵風水師，但係你咁樣豪洗十三萬幾，我係咁易計過數，每個同事加500蚊，呢筆錢夠加20個同事嘅人工喇！唔怪得前一晚約風水師可以咁爽手，上嚟講幾句，好過我啲同事日做夜做冇停手。
除咗要幫襯佢買好多古靈精怪擺設，佢仲有啲提議好騎哩，例如話某個同事同公司唔夾，叫老細最好炒咗佢，痴Q線！嗰個同事出晒名勤力㗎！連老細都話好難炒得落，結果佢接受風水師另一個提議，就係監生要嗰個同事調位，搞到佢同自己team人分開坐。
點解我咁肯定呢個風水師係神棍？佢首先同我講：「秘書姐姐，你最近應該係好忙好多嘢做，我講得啱唔啱呀？如果唔想成日OT呢，可以擺盆花喺你個位，咁樣對你個事業運有正面影響。」
廢話啦你，我前一晚9點幾用公司電話打嚟約你睇風水，你咪扮先知啦！
老細仲要戇柒柒插嘴：「係呀！我秘書好忙㗎！你咁都睇得出佢成日OT。」
真係想死。
老細最重視Sales Team，跑生意吖嘛，同風水師行到去營業部嗰陣，呢條神棍又講廢話：「呢個部門呢，左邊對住個窗，前面就係門，咁啲員工一般會覺得好大壓力，係咪有時傾緊啲生意會冇下文呀？因為呢度聚唔到財氣囉！」
請問邊個Sales唔係有啲生意會傾傾下冇下文㗎？行行都係咁㗎啦！我見班Sales都反晒白眼，得老細如獲至寶覺得好準。
今年佢都有嚟呃神騙鬼呀！老細呻2020年生意再差咗，哈！個風水師仲好意思話如果唔係上年佈陣，公司隨時執埋或者惹官非，好嘢好嘢！佩服佩服！
可能知道我老細賺少咗，今年佢搞一輪大龍鳳之後收8萬幾，又話我哋公司會重回正軌，嚟緊唔止穩定，仲會擴充，老細聽完又好開心，卒之新年後咪又係裁員，裁咗幾個同事走。
我覺得風水只係輔助，實力先係最重要，與其搞到公司鬼五馬六，又影響同事兼要裁員，不如將睇風水啲錢用嚟留住員工，或者加佢哋人工仲實際啦，起碼士氣即時提升，唔使靠啲咩烏龜同魚缸吖！
投稿讀者：Jennifer