介紹朋友入公司做 最後連朋友都冇得做

投稿讀者:Joey

我永遠都唔會再介紹熟人去自己公司做!無論幾friend都好!就算親戚都好!

今年年初同幾個friend食飯,大家咩都傾一餐,其中一個叫阿Jade嘅朋友聽到我講公司請人,跟住就不斷話想轉嚟做,叫我幫手介紹之類。

其實Jade平時冇咩,頂盡約出街遲下到,但好多時成班friend出去,梗係有人早,亦都會有人遲,所以我冇乜在意。

盡人事問下公司仲請唔請,因為我見好多人嚟in,但好似仲未揀定,膽粗粗問下啦,上司話如果係我介紹,一定優先取錄,好過用agency要畀佣金,結果我叫Jade畀份CV過嚟,佢第二日就被安排見工,仲要見完即請。

開頭係幾開心㗎,有朋友同公司做,多個人傾計,不過做做下就出現好多問題,例如阿Jade經常遲到,其他同事會走嚟問我:「喂,你個friend仲未返嘅?」

我個角色好似變咗監護人一樣,而阿Jade慣常遲到嘅缺點,平時出街冇乜所謂,嚟到公司之後就好大問題喇!

阿Jade每個月仲會請四至五日病假,結果同事又係走嚟問我阿Jade咩事唔舒服?阿Jade係咪蛇出去見工?阿Jade個個月拎幾日sick leave係咪唔鍾意公司……真係好煩呀!坦白講阿Jade遲到同請假係唔會事先通知我㗎!我又唔係佢上司,但介紹咗朋友嚟公司做之後,有咩事就全部走嚟問我,有時想幫阿Jade兜都兜唔到。

呢啲都算,阿Jade同某幾個同事特別啱嘴型,佢竟然喺人哋面前爆我啲私事,唱我之前畀條仔飛,又話我同父母成日鬧交,連我經期唔準都周圍同人講,點解我會知?有次某同事同我講:「聽阿Jade講你同伯母鬧交喎,冇嘢吖嘛?老人家要畀啲耐性,你諗下佢養大你幾辛苦。」

咩事呀?點解我啲家事會有同事知㗎?點解要唔知頭唔知路走嚟教訓我呀?

最初我都係哦下阿Jade,叫佢唔好周圍同人講我啲嘢就算,雖然唔開心,但唔通鬧個friend咩,後來竟然有一個senior女同事走嚟同我講:「有個中醫幾好㗎,喺觀塘,你經期唔準去睇下吖。」

我:「下,你點知我經期唔準?」

「阿Jade噚日食lunch講,我聽日畀中醫張卡片你吖。」

呢次真係佛都有火,唔想喺同事面前出醜,決定WhatsApp阿Jade攤牌,佢仲好意思用咁嘅語氣覆我:「你唔係嬲呀?好小事咋喎!好啦好啦!下次唔講。」

心理壓力又好,疑神疑鬼都好,有一排我成日覺得公司啲人望住我竊竊私語,眼神好古怪,又細聲講大聲笑,其實未必係講緊我,但阿Jade嘅行為已經令我好困擾,我甚至覺得自己有抑鬱,本身想辭職唔做,因為環境好唔舒服,點知竟然畀阿Jade快一步。

某次,阿Jade連請四日病假,同事又係走嚟問我阿Jade咩事?阿Jade咩病?阿Jade連請四日好嚴重?煩到仆街!!本身都唔想同阿Jade講嘢,因為當時已經同佢疏遠咗好多,班friend啲飯局有佢出席,我就一定唔會去,但係咁請假又人人走嚟問我,點都要搵一搵佢,始終當日係我介紹阿Jade嚟做,咩都不聞不問講唔通,結果我打去之後,阿Jade同我講:「我搵咗份新工呀!諗住no show幾日等炒,呢邊想我即刻返,但我又唔想賠錢走,你當唔知啦!」

我:「點樣當唔知呀小姐?我介紹你嚟做㗎!唔好令我咁為難啦!你咁大個人有冇責任感㗎!」

Jade:「得啦!你扮唔知先啦,一係我下星期話自己有大病要醫,我度度點講先。」

我真係唔知應該點做,嗰晚同咗兩個friend傾,佢哋都叫我直接篤爆阿Jade,反正佢之前咁衰,加上未辭職又返新工,即係食兩家茶禮,講出嚟絕對冇問題,何況我已經唔當阿Jade係friend。

可惜
我遲咗一步

第二朝返到公司,我上司西口西面叫我入房,原來阿Jade私下WhatsApp佢講想唔做,仲係反晒面潑婦駡街嗰隻,佢同上司講唔會賠人工,會選擇曠工直至公司炒佢,最仆街係咩?係阿Jade話已經同我講咗件事!!!!

上司質問我點解一早知又唔講,我話自己都係早一日先知,而且阿Jade冇提到會曠工直至公司炒佢,但係你都想像到啦,上司對我嘅印象已經好差,直至呢一刻,我同上司嘅關係已經修補唔到。

本身我都唔想再喺度做,無奈撞正疫情,真係搵唔到工,希望下年個市好返,我可以快啲轉新公司,不過話唔定係呢間公司炒我先。

我發誓,永遠唔會再同阿Jade做朋友,亦永遠唔會再介紹熟人去我公司做!

error: