我咪話有個伯伯想睇針灸但唔肯用醫療劵，然後佢個仔又唔肯另外畀錢嘅，呢對父子喺我哋院舍係出咗名難搞，因為佢兩個互相鬥氣，成日搞到我哋班職員做磨心，麻煩嘢當然唔止一單啦！
其他濕濕碎碎嘅唔計，非禮同事呢單我真係忍唔到。
院舍有聘請智障人士工作，有一日，嗰個伯伯非禮院舍一位智障女員工，聽返個女仔講，伯伯搣佢pat pat，然後佢走嚟同我哋職員講，當時我同另外兩位同事都好嬲，一齊去鬧爆個阿伯，已經準備好打畀佢個仔同埋報警，點知老細block住咗，唔畀我哋咁做。
老細係咁樣講：「唔好搞大件事喇，一陣傳咗出去，搞到冇生意。」
我：「非禮同事喎，咁都唔報警？」
老細：「唔好搞咁多嘢啦，分開佢（嗰位智障女員工）同呢個阿伯咪得囉，以後唔好畀佢哋有接觸，你哋分佢（智障女員工）去做其他嘢啦！」
聽返其他同事講，我哋個院舍早前大肆擴充，搞埋中醫服務，本身間咗好多房諗住請醫師睇症，但係撞正一波又一波嘅疫情，成個計劃hold咗喺度，裝修費同租金變相白白支出。
院舍近呢一年生意並唔理想，據我嘅理解，入住率唔full，減去租金，賺嘅錢其實好少，呢個亦都係擴充想做埋中醫業務嘅原因，佢希望拉上補下，同埋啲中醫服務係打算開放，你唔係住緊我哋院舍都可以嚟睇。
總之講乜都好，支出大咗，收入倒退，絕對唔係員工被非禮都要算數嘅藉口，生意唔係咁做！人更加唔係咁做！
如果要將惡行收收埋埋先有得撈，咁我唔撈喇，東家唔打可以打西家，你個良心冇咗就係冇咗，第時望返轉頭，我哋一世都會睇唔起自己。
出嚟做嘢搵錢，份人工係買你嘅時間同埋技能，絕對唔包括買埋你個良心。
而家已經辭職，有啲嘢現階段透露唔到，十分感激家人體諒，之前已經講過呢份工係由我老母個朋友介紹，我同老細頂到行兼且決裂，唔多唔少都會影響佢哋，但正如我老母所講，覺得啱嘅事就要做，佢話如果我知道呢件事都不聞不問，只係為咗保住份工，佢都會睇我唔起。
唔好為咗一口飯去出賣良知，因為老咗望返轉頭，你一定會鄙視自己。離開咗呢份工，我最唔捨得係之前提過，自願入老人院陪住老公嗰位婆婆，我而家會托同事慰問佢。
我嘅愛心同善良只係留畀值得嘅人，好似嗰位非禮智障女員工嘅阿伯，我都係會祝佢落地獄。
做呢份工雖然只得短短三個月（其實唔夠三個月），但我有好多體會，除咗見到有啲人可以為錢無視公義同是非黑白之外，我亦堅決好好照顧我老母，希望佢青春常駐，永遠健康，人老咗有多好嘢無法自主，雖然係無可改變嘅定律，但我哋都要好好愛惜身體。
《青春常駐》完
青春常駐 1
https://hkofficedaily.com/?p=16073
青春常駐 2
https://hkofficedaily.com/?p=16089