「呢個老細跟唔過㗎，一啲人情味都冇，人工又加得少，我一把年紀就話冇辦法啫，你咁後生真係要自己諗清楚，唔係叫你唔好做，不過想提醒下你囉，等陣過咗試用期要一個月通知，你自己決定啦，好好考慮下。」
3年前我入嚟呢間公司嘅時候，有個做咗好耐嘅女同事阿琴向我講上述說話，呢位資深女同事大約50歲，因為公司細同埋比較舊式，佢嘅職能好難用title去分，我個人會以Admin去稱呼佢。
阿琴平時會計下數，我哋claim錢就係搵佢，另外亦會兼任少少類似秘書嘅工作，係散亂啲，但負責嘅嘢係對內為主，基本上冇乜急切性，所以佢亦係全公司裡面唯一一個唔使OT，每晚可以準時放工嘅人。
當初入嚟當然有畀佢嘅說話影響啦，因為新人唔知頭唔知路吖嘛，聽完之後唔係唔想走，只係冇能力走，我見咗好多份工先至搵到呢份咋，何況佢講到老細咁衰，我自己又唔多覺喎，反而仲覺得老細份人幾nice同埋冇架子。
做下做下就一年，期間都會斷斷續續聽到阿琴話老細呢樣嗰樣，例如唔識做生意遲早執笠、新年開工利是寒酸、公司請親食飯啲酒樓都好cheap，甚至會講到老細啲家事，點樣唔錫老婆仔女呀，思疑佢包二奶呀……總之無論公事定私事都講到老細好差。
有份聽嘅唔止我一個，其他同事都聽阿琴講過類似嘅事，簡單嚟講就係周圍唱老細，其實有啲好deep嘅嘢例如唔錫屋企人之類嘅話題，我都唔明白阿琴點解會知得咁清楚，咁我又唔會參與嘅，當故仔咁樣聽下囉！
後來呢啲嘢傳下傳下傳到去老細耳邊，結果阿琴就畀老細炒咗，記得佢被炒當日仲拎住兩大袋嘢（公司嘅私人物品）行埋嚟同幾個同事講：「都話㗎啦，呢個老細冇人情味，做咗咁多年話炒就炒，你哋自己小心啲啦，幫呢間公司唔值得㗎！」
我留意到一個細節，就係阿琴通常會向junior或者新同事講老細壞話，都有啲人係畀呢啲說話影響咗對老細嘅印象，而做得耐嘅同事就比較少同阿琴交流，就算係被炒當日都唔見資深嘅同事走去慰問阿琴。
直至有一次飲茶，有人提起阿琴以前claim錢好慢，咁不如「講開又講」啦！我膽粗粗問在座幾位senior少少嘅同事有冇聽過阿琴講老細壞話。
「佢唔敢同我哋講㗎，因為我哋知咩事。」
「所以唔好亂咁做好人，總有啲人會得寸進尺，反轉豬肚就係屎。」
「老細一早知阿琴周圍唱佢啦，係念在咁多年主僕唔郁佢啫！」
「今次咪忍無可忍佛都有火囉，走去唱老細包二奶，笑死。」
真係要講句～～～隻隻字我都聽得明，加埋一齊就完全唔明。結果喺我不斷追問嘅情況下，終於知道以前發生過咩事喇。
喺我入嚟呢間公司之前，有次阿琴話佢揸的士嘅老公炒車，雖然有嗰啲咩第三保（我唔識車），但係佢老公私人冇買保險，真真假假冇人知，總之重點就係要入醫院同埋借醫藥費，因為之後要接受一啲物理治療之類。
當時阿琴問老細借錢，老細唔止有借，仲安排佢老公轉去私家醫院，聽講係仁安，另外更親自致電一位喺仁安做醫生嘅老友，全程特別照顧阿琴老公。
點樣特別照顧呢，除咗好多嘢都優先同埋講解得特別詳盡之外，阿琴老公仲可以upgrade去私人病房，大約係咁上下。
不過呢件事完咗之後，阿琴就開始打老細主意，首先係唔想老公再揸的士，希望可以喺公司安排一個職位。
因為呢單嘢老細有同幾位senior傾過，阿琴老公無論學歷同經驗都冇一樣適合公司，加上老細又唔需要司機，所以最終都冇位畀阿琴老公入嚟做。
聽講阿琴有提議過老細開一啲新嘅position，例如office assistant送下信之類，但公司真係唔需要，老細已經一而再，再而三拒絕阿琴嘅提議。
又過多一排，阿琴直頭問老細借錢，理由係老公唔想再揸的士，希望可以借啲本錢搞小生意。
我：「雖然我唔識阿琴老公，但其實成件事都幾好笑，佢老公唔想揸的士，點解會諗到去問老細借錢搞生意呢？」
其中一位senior同事答我：「貪得無厭囉！見到老細幫佢老公搞私家醫院單嘢咁慷慨，覺得老細好多錢唔志在，借錢搞生意件事我知呀，阿琴親口同我講，佢話老細用老婆管數所以冇辨法借錢嘅藉口好牽強，其實老細個藉口咁牽強咪就係畀緊落台階你囉！又唔諗下佢老公入醫院嘅時候，老細幫咗佢兩公婆幾多，upgrade去私人病房係打人情牌㗎，老細後來請嗰個仁安醫生食飯，係我幫老細走去訂紅酒做禮物，阿琴完全唔知背後有呢啲事，不過知唔知都好，唔借錢畀你老公搞生意就唱人，點講都係無品啦！」
以前唔明咩係「救急不救窮」，不過喺呢件事上面我睇得好清楚喇，急病同急事如果幫到手一定幫，但係長貧難顧，如果一個人係因為窮先問你借錢，自己又唔諗方法去改變，咁樣其實唔算急，而且呢種窮困仲會不斷延續。
阿琴因為老細安排私院就得寸進尺，又想安排老公入嚟做，又想借錢搞生意，老細拒絕唔係冇人情味，係阿琴完全唔明白自己嘅價值同定位啫！（完）
做好人最後搞著自己嘅case多不勝數，係咁易輯錄返兩單舊文，睇下大家有冇印象。
朋友嚟我公司見工衰咗 唔檢討仲周圍唱我
https://hkofficedaily.com/?p=16101
一間唔炒人嘅公司 一個唔識做嘅同事
https://hkofficedaily.com/?p=12440