頭先喺Facebook分享咗一單～～～阿叔同事著80s「現代」短打，老細勒令全體男同事以後要著長褲。
雖然我個記者行家叫苦連天，又話熱又話生袋癬，但如果發生喺我身上應該冇乜嘢，因為本人其實好少著短打，反而以下呢單喺office發生嘅「累街坊事件」就真係搞到我。
曾經喺一間細公司返工，十幾人㗎啫，老細好親民好易話為，員工唔舒服請sick leave都唔需要醫生紙，佢成日話：「公司咁細，畀唔到咩福利大家，所以easy啲啦，最緊要做得開開心心。」
有咁嘅老細都唔錯啦！可惜某同事就利用呢一點去攞盡著數，每個月起碼拎7至10日「sick leave」，咁一星期返5日工，一個月加埋返20日左右，間唔中又有紅日，每個月再7至10日「病假」，有時真係半個月都見唔到佢，醫生紙唔使畀，人工照出，呢啲都算喇，累到其他人喺工作上要follow佢啲蘇州屎，好擾民㗎嘛！
嗰位同事做戲又唔做足全套，有時會自爆：「噚日同男朋友去迪士尼，曬到黑晒囉！」
噚日？噚日星期一喎！working day喎！你明明9點打返嚟話發燒要請假㗎！
唔知大家有冇做過啲公司係唔炒人，我當年做呢間細公司就係咁，除非個員工自己辭職㗎啫，否則就算廢到一個點，老細都唔會郁佢，你同我冇咁厚面皮，永遠都做唔出㗎喇！最可悲係肯做嘢嘅同事因為咁而心灰意冷，老細唔炒廢人，就唯有自己辭職，最後做到嘢嘅人離開，唔做嘢嘅人留低，氣氛愈嚟愈差。
老細睇住幾個幫得手嘅同事resign，又無力挽留，結果就改policy，以後sick leave都要有醫生紙，要跟足規矩，所以有陣時太過放寬都唔係好事。
我朋友間公司都有類似情況，不過唔係sick leave問題，係返工時間問題。
佢公司係做design之類，合約列明返工時間係9-6，但老細就唔多care，畀好大自由度班員工，大家本身歡天喜地返10點至10點半，唔使補返鐘，一樣係6點走得，好可惜，又係有人得寸進尺，日日lunch先返到office，唔係一日半日喎，係everyday喎！
呢啲位其實好尷尬，其他同事有樣學樣又唔係，始終老細都好好人啦，10點幾返工一樣隻眼開隻眼閉，但個別同事唔識做，日日12點幾1點先返工，老細未出聲，其他員工唔通衝出嚟教訓班遲到大王咩！
後來佢老細聞到陣味，再細心觀察個別同事又真係lunch time先至施施然返office，6點未夠已經do卡鬆人，結果公司就宣布揸正嚟做，以後全人類最遲10點返工，過10點當遲到，雖然～～本身contract都係返9點，但忽然限時限刻始終令成班人多咗份壓力，之前開開心心唔得嘅，係要不斷踩老細條底線，呢啲就真係攬炒喇！
呢個道理同我哋平時對人好，對方唔識感恩，仲苛索得愈嚟愈多一樣，最無奈係搞串咗個party，累到其他無辜嘅同事吖嘛！