對於辦公室座位嘅擺設，每個人都有唔同嘅取態，好似我咁，從來唔會擺任何私人物品，方便第日轉工唔使執嘢吖嘛，有人仲誇張過我，連私家杯都冇隻，不過亦都有人會花心思去佈置，貼私人相、排滿心愛嘅Figure，擺滿名酒好似開酒吧咁我都見過。
即使你擺啲酒或者Figure喺公司，其實都係好容易搬走，但我有個女同事就犀利喇，唔止放滿私人物品，就連張電腦椅、keyboard、mouse，仲有monitor都係私伙，加加埋埋「置裝」用咗5位數。
呢位叫Mia嘅女同事係靚女一名，佢仲成日自稱上圍有34C，咁我目測都有嘅……如果冇裝假狗的話。Mia本身靠顏值同身材已經好受公司男同事歡迎，再加埋佢好鍾意打機，咁就更加不得了，連IT嗰幾位平時唔出聲，冇咩事唔會走出嚟嘅宅男都趨之若鶩，成日借頭借路行過去同Mia傾計。
咁究竟點解個個都知34C Mia嘅嗜好係打機呢？因為佢成日周圍同人講以前條仔係玩職業電競，耳濡目染之下都鍾意埋一份，雖然已經分咗手，但呢份興趣仍然持續。
Mia係當住我哋面向男上司表示：「唔慣喺office呢啲環境做嘢呀，平時最集中精神就係打機嘅時候，鍾意呢種氛圍，我可唔可以將自己個位佈置成咁呀？」我親耳聽住佢講「氛圍」兩個字，我冇改佢，原汁原味打返出嚟。
男上司都係34C Mia嘅fans之一，Mia未入嚟做之前佢成日黑口黑面，後來就變咗笑容滿面嘅親民上司，是但啦，工作氣氛easy咗，對我哋原有班下屬而言都係一件好事嚟嘅，呢樣嘢不得不多謝Mia嘅出現，就連電腦有問題嘅時候，IT嗰幾個宅男都唔會再叫我哋熄機再開就算，每個人嘅精神面貌都變晒呀！
有次開會，男上司向老細親述咗Mia嘅要求，本以為會被否決，點知老細講咗句：「我冇所謂呀，又唔係用公司錢，不過Mia第日辭職麻煩咋 ！」
男上司：「咁咪仲好，即係代表Mia會長做囉！」
如是者，Mia就興高采烈咁豪裝自己個位，最初大家估佢都係換下keyboard同mouse咁㗎啫，冇諗過Mia第一樣係換咗張電腦椅，正確嚟講嗰張係電競椅，仲要好大張，仲記得件貨送嚟公司嗰陣，男上司自言自語講咗句：「乜咁大鑊呀！」
未算大鑊！keyboard同mouse都係會閃光嗰隻，然後就輪到兩個巨Mon，你冇睇錯呀，係兩個！兩個巨咪襯兩個巨Mon，絕配！
IT同事直頭主動幫Mia駁晒啲線，等佢可以將平時做嘢嘅畫面一分為二用兩個Mon輸出，我到而家都諗唔明點解入下資料同埋打下excel要用兩個巨Mon，乜電競係要兩個Mon㗎咩？我以為玩股票先會咋！Anyway，「氛圍」呢啲嘢我真係識條鐵咩！
平時離遠望Mia個位已經係會閃光，但就見唔到人，因為兩個巨Mon下面仲有鐵架升高咗，呀34C準電競女選手仲買埋個earphone全程戴住做嘢，所以你嗌佢係聽唔到㗎，要走埋去拍佢先得。
不過Mia又唔會喺office打機，純粹用嚟一路做嘢一路聽歌，Anyway，因為Mia張電競椅實在太掗拃，所以就有個別唔打機嘅同事有微言，咁當然都係以女同事為主啦，男同事普遍嚟講都係向Mia投以欣賞嘅目光，雖然大家都知道欣賞嘅係巨咪而唔係巨Mon……
後來Mia似乎覺得個位嘅「氛圍」仍然唔夠，所以再向上司提出兩個要求：1）買個屏風圍住自己；2）想將個位上面盞燈熄咗，因為佢想喺類似網吧嘅環境同燈光下工作。
我都係其中一個好「欣賞」Mia嘅男同事，不過今次我都要爆喇，首先返過office嘅朋友應該知道，辦公室頭頂盞燈唔係照你一個㗎大姐，你就話有啲五顏六色嘅閃光keyboard啫，咁我哋點呀？黑暗中漫步呀？成個office改咗做網吧好唔好？
同埋我唔知Mia口中嘅屏風係咩事啦，不過見佢啲嘢全部咁大咪，我指兩個Mon同埋張電競椅，你個屏風都唔慌細，請問我呢啲坐入面嘅同事點樣行出嚟？爬出去？定係每次去廁所同斟水都敲下你個屏風再問句：May I come in？定係問May I go out？
好在呢次男上司識得ban，最後冇成事，但係幾位IT男同事就係咁話我哋個上司好衰……笑死，你哋搭間房畀Mia坐囉！
之前疫情咪成日有得work from home嘅，正常梗係開心啦，唯獨Mia自己堅持要返office，咁當然有幾個「fans」捨命陪34C啦，佢哋嗰陣有冇熄晒啲燈打機就唔知喇，我淨係知Mia最近辭職，而家煩惱緊點樣搬走啲電競setting，其實仲使乜諗吖，call架貨van咪得囉！（完）
想借個位同大家講聲多謝，「久休復出」嘅《辦公室日報》YouTube channel無疑係做得比之前辛苦，我哋要從唔同渠道去搵受訪者，Interview之前亦要做大量嘅準備功夫，畢竟每個受訪者都係來自不同行業同背景，有啲甚至係好冷門，花費嘅精神同時間係超出預期，但係當製成品面世之後，我認為所有嘢都係值得，除咗主觀嘅滿足感之外，我亦深信內容係有營養，令收看嘅朋友可以「有嘢帶走」。
要喺繁忙日程當中花10分鐘睇片係一件奢侈嘅事，衷心感激每位subscribe嘅觀眾，希望大家喺2023年會同《辦公室日報》一齊成長。
【日本職場】處理人身事故跳軌善後工作，公司飯局被上司兜巴星，日本電車維修員分享工作辛酸
https://youtu.be/PMkJ44n8AVY