我以前好鍾意睇一套美劇叫Prison Break，好多人話Season 1好睇，之後唔好睇，我細佬係其中一個，佢話去到Season 2成功越獄已經爛晒，起碼個名爛咗，成個Season喺出面，仲叫咩Prison Break。
之前辦公室日報都有類似感受，唔講office嘢又擺去辦公室日報就好怪，所以上年5月就拆咗個叫《聶瞳》嘅page出嚟，初衷係post下生活嘢，旅行嘢，同埋飲飲食食之類，跟住踏入6月，大家都知香港發生咩事啦，當時有幾個topic開咗都冇講埋落去，記得有次講英國之旅，另外有一次講點樣營運一個fb page，結果……我兩個page都係不斷狂屌黑警同政府，變咗冇分別，原意唔想咁，但每一次出去遊行，每一次睇到live同埋記者會，真係好難唔嬲。
而家開始慢慢想tune返正，想同大家分享一啲辦公室以外嘅事，我嘅option有兩個，一係直接delete咗呢個page，以後只談公事，一係就改過個名，令到兩個page可以明確分辨。
我問過啲friend：「不如改做《聶瞳的快樂與哀愁》啦！」然後我都唔記得聽到幾多句粗口，其中一句係：「DLLM唔好啦，即刻unfollow呀！」
我又提議過不如叫《聶瞳的後花園》，同事隨即問：「即係玩屎忽？」
呢樣又唔好，嗰樣又唔好，既然個page係講生活嘢，不如叫《聶瞳Simply Life》啦，朋友又話：「Simply Life藍㗎喎！」
直接啲喇，不如叫《聶瞳光復香港》，今次又到同事問：「辦公室日報係咪唔講政治先？如果兩邊都講，又係犯咗重疊呢樣嘢，不過你大台一定講㗎啦，都忍唔到口。」
唔……你哋有冇咩好名提議呢？因為fb轉page名有少少守則，原本個名唔可以改動太大，起碼要有返一隻字係相同，換言之一係留個「聶」字，一係留個「瞳」字，一係個名揹住「聶瞳」兩個字，然後前後加嘢，我改名真係好九流（第日生個仔要改名唔知點算好🤦🏻♂️），有冇好名推介呀？又要痴住聶瞳，又要表達到係講辦公室以外嘅生活事，好難諗呀！