我應該開多檔感情咨詢服務，因為朋友知我做speed dating呢行，就算冇配對需要，都會搵我講好多男女問題，不過本人都有愛莫能助嘅時候。
有位女性朋友同一個男仔離離合合三次，第一次係個男仔一腳踏兩船畀個女仔嘅屋企人撞見，然後個男仔解釋係女同事，因為工作日久生情，所以同咗個女同事一齊；第二次係呢個男仔主動搵我個女仔friend復合，但又衰同一樣嘢，喺交友app食女，食到出面條女搵我個女仔friend攤牌，乜做第三者都咁惡㗎咩？最後個男仔揀咗交友app條女，分手原因係覺得大家淡咗；第三次都係個男仔主動追返我個女仔friend，話知錯，已經定性，想追求返平淡生活。
你又點諗到我個friend竟然心軟，問我好唔好同個男仔第三度復合，仲話畢竟都斷斷續續咁多年。
我：「狗改不了吃屎，你仲問我好唔好同呢個人復合？你對唔對得住自己呀？」
「如果佢唔鍾意我，都唔會三番四次搵返我啦，就係衰過兩次，應該唔會再犯同樣嘅錯啩。」
唔想再聽，因為呢個女性朋友唔係嚟攞意見，佢只係想攞認同，想我支持佢復合。
同樣嘅錯唔會一而再，再而三地重犯，如果會，呢樣唔係叫犯錯，係叫選擇。仲有，一個人當初離開你，無論係冷暴力不辭而別、狠狠地當面撇低你，定係話你知有苦衷，其實背後嘅心態都係一樣，就係佢當時覺得冇咗你，佢會過得更好更開心。