姨媽打畀我：「你表姐呀，上次散咗之後一直冇拖拍，幾年喇！你公司係咪有男仔介紹呀？」
「姨媽，表姐未必鍾意㗎，你畀佢自己揀啦！單身都係一個option。」
姨媽：「咩惡唇？」
「即係選擇呀，畀佢自己話事啦！拍拖都唔一定好㗎！」
姨媽：「你鋪話法，表姐30幾歲喇，再唔結婚就做高齡產婦，幾多錢？姨媽畀啦！」
其實Single唔一定有問題，大把單身人士正常過熱戀中嘅人，佢哋反而比其他人更清楚自己想要咩，唔會隨便搵個人就話試下，特別係人大咗，愈嚟愈慢熱，最好約實時間先出嚟食飯，少咗即興，過程中慢慢了解大家喜好，唔會睇幾張相，傾幾晚電話，跟住就趕頭趕命走去投入一段感情。
不過姨媽唔會明㗎喇，上一代人覺得年齡係一條條死線，幾多歲就應該結婚，幾多歲之前就要生BB，做人已經好辛苦，何必喺感情路上都要追Target呢！