因為今朝收到份CV，諗返起一段親身經歷嘅趣聞。我都係做獵頭，幾年前有個英國客要喺香港開公司，真係由零開始嗰隻，所以呢單生意唔係幫佢請一兩個人，而係幫佢請晒成個department，咁梗係肥過肥仔水啦，但重點係過程相當輕鬆。
做獵頭，收到客戶委託請人之後，來來去去都係嗰幾招搵求職者㗎喇，睇下自己network有冇人選，包括曾經接觸過嘅candidate，其次就係出招聘廣告，再唔係就去LinkedIn搵人，嗰次我見請晒成個department咁多，第一件事就去刊登job ad先啦！
當時收到一份CV好fit我英國客間公司，即刻打畀個求職者Raymond傾傾再約見，真係一拍即合，然後Raymond好直接咁問我：「請問你個客係咪要請6至7個人？而家搵晒未？」
我：「未呀，剛開始之嘛，不過你放心啦，個人覺得你好適合，又有咁多個位，應該冇問題㗎喇，呢幾日安排你視像見一見嗰個英國老細。」
Raymond：「我唔係咁嘅意思，因為我有幾個同事都想轉工，啲background同我差唔多，你會唔會想見埋佢哋？」
我：「梗係想啦，介唔介意叫佢哋send埋CV畀我？不過你哋集體走呀？」
Raymond：「個個都想走，你唔請receptionist同埋茶水阿姐咋，如果唔係我都可以叫佢哋send CV畀你。」
聽返呢位求職者Raymond講，佢老細好鍾意PUA下屬，特別係人身攻擊同埋set一啲冇可能做到嘅target出嚟，甚至曾經迫到一位女同事要食抗抑鬱藥，眼前呢位Raymond話見我之前兩日先畀老細咁話：「你咁廢，第日轉工唔好同人講喺我呢度做過。」
（註：有關職場PUA，可參閱另一篇舊文章：https://hkofficedaily.com/?p=20192）
Raymond仲講咗好多人身攻擊嘅例子，但事隔多年，有啲字眼我都唔記得咗喇，總之佢就一口氣介紹咗幾個同事嚟見工，果然個個嘅background都差唔多，理論上全部都適合，咁我就膽粗粗一次過send晒畀個英國客啦！
人就一定啱使㗎喇，當時係驚英國客介意呢team人係嚟自同一間公司啫，點知鬼佬完全唔mind，仲話新成立嘅department如果有班已經建立咗默契嘅同事，可以慳返好多磨合嘅時間，呢個英國老細真係好難得，絕對係一個好客。
結果我真係將Raymond成team人請晒去英國客間公司，總共7個人，本來有8個，可惜其中一位話自己直情想轉行所以唔過檔，咁唔緊要啦，一次過開7張單已經夠晒肥仔，過程仲要咁輕鬆，幫到個客之餘，我又有豐厚嘅佣金，不過冇過檔嗰位同事就同佢公司漏咗口風，畀個衰老細知道成班人係經我呢間獵頭公司跳槽。
Raymond個衰老細打去我間獵頭公司投訴，仲直接搵我對質，佢話要告我喎……
「你撬晒我成team人，我一定搵律師告你！」
我：「請問係咩罪行？」我自己講完都笑，係衰詐騙吖，盗竊吖，行賄吖，定係姦淫擄掠？
「總之我就一定要告你！告埋你間獵頭公司！」
我唔係驚，但由於佢講到咁實牙實齒要告，所以都要同返我獵頭公司老闆講，我老闆話：「告啦告啦，告得入就告啦，佢間公司而家成個department走晒吖嘛，會唔會需要獵頭服務呀？你可以話為表歉意畀個8折佢喎！」
🤣🤣
咪話今朝收到份CV嘅，又係Raymond個前老細間公司出嚟，其實呢幾年刊登完招聘廣告之後，成日會收到呢間公司啲人嘅CV，相反地，個英國客間香港公司再冇生意畀我，唔係唔滿意我哋服務，而係基本上冇乜人走，當年Raymond成班人到而家仲做緊。
至於我間獵頭公司最終有冇畀人告？等咗幾年都未見到呢封「傳說中嘅律師信」，其實啲員工好地地點會想走吖，仲要成班一齊走，與其花時間搵律師告我哋撬晒你啲人，不如反省下自己點樣做老細，反省下間公司有咩問題仲實際啦！