一大早返公司阿姐就同我哋呻：「 你哋評下理，幾個月前我老爺過咗身，咁老公嗰邊係大家族，有成五兄弟姊妹，設靈嗰日都夠晒人啦，朋友一般夜晚放工先嚟，咁我咪唔特登請假囉，當日收工已經趕過去，唔明我老公嬲乜？」
我哋幾個同事聽到都感到愕然，唔係因為佢老公嬲，而係從未聽過阿姐提及佢老爺過身嘅事，冇請喪假，冇一絲悲傷，返工大過天，究竟係對份工有責任感，抑或佢個人太無情呢？有同事唔想附和佢又唔想評價，所以接住問：「幾時嘅事？冇聽你提過嘅？」
阿姐：「咪去黃生公司sell橋嗰日囉，你兩個都有同我去㗎，嗰個黃生出名難約，如果上次改期就唔知改到幾時㗎喇！」
我：「我記得嗰日係星期三，因為黃生話有馬跑，5點半已經催我哋走，然後你冇返公司直接從荔枝角放工。」
阿姐：「係呀，你都記得哩！設靈當日我去到都係6點鬆啲啫！」
我：「我記得好耐之前有長輩過身，好似係設靈第二日就上山，程序係咪咁？但你好似星期四都冇請假，因為印象中你好耐冇放假。」
阿姐：「我老爺嗰邊都一樣，第二日去火葬場同埋有餐解穢酒。」
我：「你冇去？」
阿姐：「其實火葬場呢啲又唔係咩儀式，都係跟旅遊巴去哥連臣角之嘛，咁我有黃生個project跟緊，已經同老公解釋咗，我唔明佢嬲乜。」
呢位阿姐不嬲都好強勢，佢嘅工作能力唔需要懷疑，但係老爺過身唔請假，恕我呢啲凡夫俗子打工仔唔能夠理解，呢件事原來老細都唔知，因為阿姐真係冇請喪假，佢嘅理據係人死不能復生，而且咁努力工作都係為未來，何況喪禮已經有足夠人手打點，佢去到其實冇乜嘢幫到忙，咁點解唔搞掂公司個project先。
阿姐：「自從呢件事之後，老公對我嘅態度就好冷淡，但你認為我唔傷心咩？老爺走咗我都好傷心㗎！而家每日辛辛苦苦放工返屋企，佢就對我不瞅不睬，有需要咁樣咩？我唔係吃喝玩樂唔出席喎，我要做嘢吖嘛，設靈嗰晚都去咗殯儀館啦！」
跟咗呢個阿姐咁耐，好清楚佢嘅為人，佢叫你畀意見並非真係需要意見，只係想你附和，有個同事唔識死講咗句：「你老公應該好傷心，因為佢爸爸過咗身一定好需要人support……」
都未講完，阿姐已經急住反駁：「我覺得人應該要向前看！」
平時好少聽阿姐講私人嘢，聽完呢件事更加覺得佢工作上嘅人設原來同現實生活一樣，你覺得係點唔重要，最重要係佢覺得係咁就係咁。
雖然唔知阿姐個老爺因咩事過身，不過乜嘢原因都好，就算係一早有晒心理準備都好，佢老公失去至親一定好痛苦，而你作為枕邊人，竟然連出席喪禮都好似走馬看花咁樣，份工冇咗可以再搵過，更何況唔見呢個客或者跟少一日個project真係咁大影響咩？
細細個讀書已經有教，修身齊家治國平天下，次序上係完善好自己，處理好家庭，跟住先可以管理更大嘅事，我哋做下屬嘅睇住你連老爺過身都可以咁無情，長遠同你一齊工作真係唔敢想像，假設我哋屋企第日有不幸事件發生，你會唔會一句「人應該要向前看」而唔畀同事請假？
其實我有啲同情佢老公。