女同事Janice無情白事入房向我遞辭職信，因為佢好做得嘢，廿幾歲女仲有交帶過某啲Old Seafood，所以我循例都要了解下發生咩事，並且嘗試挽留，咁當然啦，如果Janice有更好路數，我都唔會阻員工發達嘅。
事緣呢個妹妹早排接受咗某傳媒訪問，個訪問內容係講Cosplay文化，喺YouTube啲片裡面除咗有佢同一班志同道合嘅人受訪之外，仲會見到Janice多個角色扮演嘅造型，點知公司裡面有同事睇到，Office嘅人就一個傳一個喺度熱烈討論。
YouTube件事我知少少，因為有兩個同事曾經向我提及，其中一個係Old Seafood，嗰次佢兜口兜面話公司有個怪人，叫我留意下。
「咩咁怪？」
Old Seafood：「你睇咗呢段片先啦，著好少布，露咗半個胸，都唔慌正經女仔啦！」
第一次睇呢條YouTube片，就係呢個Old Seafood主動send畀我。
「有咩問題？」
Old Seafood：「咁都冇問題？好豪放喎，你睇下啲麻甩佬，個個舉住部相機影佢個胸。」
「你都係未答我有咩問題？呢啲係員工嘅私事，加上又唔係咩咁大件事，何況個人興趣同工作完全冇抵觸。」
Old Seafood：「有損害公司形象喎！」
「你覺得我哋公司係世界一百大企業呀？Janice做跟單又唔使見客，點樣損害公司形象呀？佢接受訪問有講自己做邊間公司咩？」
Old Seafood：「咁又冇，不過風氣唔好囉！」
「出返去做嘢啦，顧掂自己啲嘢先去理人。」
另一個向我反映嘅係隔籬組女阿head，佢叫我注意自己班下屬。
女阿head：「你有冇睇嗰個訪問呀？公司班人瘋傳喎！」
「知道有件咁嘅事，但冇時間睇晒，咩事呢？」
女阿head：「睇緊啲你嘅人好喎，就早幾日返工之嘛，雖然佢有著外套，但一睇佢下身已經知裡面著住水手服，仲有嗰隻日本學生妹嘅長襪，咁樣返工好咩？」
「請問佢係咪露體？公司有冇規定著咩衫？其實佢入面著咩影響到你咩？」
雖然我從未了解過Cosplay呢樣嘢，但真心想問一句，究竟世人對Cosplay有幾大敵意？呢個只係個人嗜好，同你鍾意足球、睇書、行山、煮嘢食、做gym等等，其實都係同出一轍，點解要戴有色眼鏡去睇人呢？你覺得佢Cosplay係異類？咁有冇諗過佢睇你都可能係異類？
因為一直覺得好小事所以冇擺喺心，而且都過咗一段時間，估唔到件事靜咗落嚟之後，Janice失驚無神遞封辭職信畀我，原來喺我個位係靜咗，可能大家都唔敢再同我講太多，但對於Janice嚟講就從未靜過。
Janice話，自從訪問出街之後，同事睇佢嘅眼光好奇怪，仲有個別同事講嘢語帶相關，例如個Old Seafood就講過～～～唔好做呢啲呀，啲衫咁難睇，真係唔好著返公司。
我同Janice講：「你有冇直接鬧返佢？」
Janice：「我就係驚自己忍唔住鬧佢，所以決定辭職喇。」
「你自己唔鬧佢，下次我就幫你鬧佢， 一句講晒，你鍾唔鍾意份工先？」
Janice：「鍾意呀，可以自己做自己嘢。」
「除咗自己做自己嘢，我仲希望你繼續做自己，同其他人唔一樣都冇所謂，唔使理人，我永遠企喺你嗰邊。」
估唔到我呢個大叔仲可以令到妹妹仔眼濕濕，最開心係可以留低一個幫到手嘅人，我作為上司好簡單㗎啫，只會著重員工嘅工作表現，私人生活一概唔干涉，下屬工餘時間鐘意做乜，有啲咩嗜好都係佢個人選擇，你出份糧畀人，連人哋嘅興趣同生活都要管埋？你份糧幾錢咁巴閉呀？仲要份糧係公司出，唔係呢啲說三道四嘅同事出，所以更加唔需要理佢哋。
我希望Janice可以強化自己嘅心理質素，因為戴有色眼鏡睇Cosplay嘅人一定唔止咁少，你可以為咗好多原因辭職，但如果係為咗班八公八婆就真係好唔抵，你估人人都有資格Cosplay㗎？而家唔做，唔通好似嗰位Old Seafood咁嘅年紀先做咩？扮龜仙人都ok嘅。
不厭其煩問多次先，follow咗辦公室日報 IG未呀？嗰邊嘅內容完全唔一樣，輕鬆啲生活化啲，遲下仲會開Live㗎！今日都出咗新post，希望喺 IG見到大家啦～
https://www.instagram.com/officedailyhk/