懷疑下屬扮病 致電診所質疑醫生

出嚟打工8年,真係未試過咁嬲,上個月我胃抽筋所以請咗病假,第二日返工循例交張醫生紙畀我阿姐,因為要佢喺另一張form簽名先可以再交去人事部,當時佢已經係咁畀說話我聽,單單打打話我趁公司最忙嘅時候請假。

其實公司冇話咩最忙嘅時候,因為根本未得閒過,何況胃抽筋我都唔想,如果真係特登偷懶,我不如趁星期五或者星期一請sick leave自製長假!嗰日係星期四,我唞完一日之後都係要返工。

呢個阿姐唔淨止對我係咁,其他幾個同事請假佢都一樣會懷疑,我唔明點解要咁樣,公司每個月都有「有薪病假」,同事都唔會特登去攞,因為大家知道如果做唔晒啲嘢,放假返嚟咪又係要自己跟返,完全冇著數可言。

不過嗰日阿姐可能心情唔好,我畀醫生紙佢嗰陣係未停過攻擊我,話我星期三仲好地地,見我同其他同事有講又笑,第二日send個msg嚟請假,問我係咪前一晚玩得太夜,唔夠精神唔想返工先至講自己病,仲話未聽過我有胃抽筋……

我:「係咪一定要keep住有胃抽筋,先可以話自己胃抽筋要請假?你估我想唔舒服㗎?我對上一次攞sick leave係幾個月前,一個人有病痛好正常啫,我一年都唔知有冇請5日病假。」

呢個阿姐乞人憎在唔會同人硬拼,但佢會笑住咁樣話你:「你唔使咁激動,我唔係話你詐病,見你星期三仲好活潑周圍同人講笑啫,你係咪前一晚玩天光呀,見你朝早6點幾msg我請假。」

點忍呀?你笑住講就代表友善咩?難聽過粗口囉!我承認自己當時好激動駁佢,換轉係你真係忍到咩?

我:「我唔係玩天光,我真係胃抽筋痛咗成晚,如果我較鬧鐘搭正9點先同你請假,你都係會懷疑我㗎啦!」

阿姐係keep住個嘴角斜斜地陰笑嘅衰樣(戴透明口罩睇住佢笑,好討厭),佢仲要懶淡定咁講:「得啦,我簽完名會幫你交畀人事部。」

呢啲人真係好討厭,下屬病咗已經唔會要求你去關心,而你仲要咁樣懷疑同埋畀說話人聽,大家都係出嚟打工啫,需唔需要咁呀?

同一日晏晝,我竟然收到診所打嚟嘅電話,佢哋話有個自稱係我公司嘅人打去,想問我嘅病情之餘,仲質疑佢哋係咪太容易開醫生紙……

打畀我嘅係診所姑娘:「你同公司溝通返啦,我哋係唔可以透露病人任何資料,我話咗畀醫生聽,醫生都有啲嬲,因為你公司同事喺度質疑我哋亂開醫生紙。」

其實我已經好肯定姑娘口中嘅同事就係我阿姐。

我:「佢問我病情同埋話你哋亂開醫生紙?」我重複呢句係因為想搵到證據,當時已經盤算緊可唔可以搵私隱專員公署之類。

姑娘:「你同事問得好小心,佢問你係咪真係胃抽筋啫,但無論佢問咩都好,淨係要我哋答Yes or No都好,我哋都唔可以透露病人任何資料,同埋佢用詞上唔係話我哋亂開醫生紙,而係問我哋係咪好容易開醫生紙,或者咁啦,你同你公司或者同事溝通好啲。」

阿姐就係咁陰濕,佢連用詞都計過度過,聽姑娘咁樣形容,我已經排除咗係HR打去嘅可能性,呢個人一定係我阿姐。

知道咗呢單嘢之後我即刻同阿姐嘈,佢依舊喺度扮晒神態自若,我直接就走去搵office裡面最大粒嗰個投訴(因為老細唔喺香港),但係大粒高層好明顯企阿姐嗰邊,佢叫我冷靜啲同埋唔好咁緊張,又話公司有合理懷疑應該可以打去問,個高層係咁講:「醫生紙有診所嘅電話同地址,目的都係畀人查詢啫,係咪?」

或者佢講嘅point係合理,但係一個員工請假,仲要唔係成日請,今次胃抽筋亦只係sick leave咗一日,然後你竟然打去診所咁樣問,我覺得再做落去都冇意思,所以辭咗職喇。

我有同自己嘅朋友講過呢年事,佢哋嘅分析係阿姐唔鍾意我,所以先會趁住機會,睇下打去診所捉唔捉到我嘅錯處,就算唔得,亦預咗我會知道,所以而家憤而辭職係中晒計。

我唔知朋友嘅推斷有冇道理,亦唔知呢個阿姐係咪有咁嘅陰謀,但無論結果係點都好,呢種上司同埋呢間公司,我都唔想再幫佢哋做嘢。(完)

關於醫生紙嘅爭拗,之前仲有呢單,內附《註冊中醫名單》
中醫病假紙未必承認同事感針對作出報復
https://hkofficedaily.com/?p=18124

隔籬街見工請假都慳返 In完返嚟扮冇事繼續做
https://hkofficedaily.com/?p=17348

YouTube男公關訪問呢幾日有第2集喇,第1集大家睇咗未?
https://youtu.be/FEjcwu3Yy10

error: