有個叫Dennis嘅同事早排請病假，但就交咗張中醫嘅醫生紙，上司話唔承認，原因係「並非註冊中醫」，結果兩個喺度拗勞工法例，幾日後Dennis辭職，然後留低一大壇蘇州屎，唉，你憎個上司都唔好搞埋我哋吖嘛，其他同事無辜㗎！
佢哋兩個嘅恩恩怨怨一匹布咁長，多次喺office嘈交，其實兩邊都有問題，上司講嘢有時係幾刻薄，但我以一個轉過幾次工嘅人去睇，呢位上司雖然稱唔上係好，不過亦未致於太衰，正常發揮啦，出面有更多老闆同上司更加賤。
Dennis都唔係善男信女，幾乎每日都遲到接近一個鐘，跟嘢甩甩漏漏，一向係trouble maker，如果撇除公事，Dennis係一個幾funny嘅男仔，我相信佢出面都多friend嘅，但做嘢就好唔上心，拍住佢預咗有手尾跟。
如果要形容Dennis同上司嘅關係同埋處境，應該係似《流氓師表》裡面張家輝同盧惠光咁，你唔食煙我咪唔搭你膊頭囉，你唔搭我咪唔食囉～～Dennis：你唔針對我咪唔玩嘢囉！上司：你唔玩嘢我咪唔針對你囉！
嗰次Dennis請病假，拎咗張中醫嘅醫生紙返嚟，上司check完之後話公司唔承認，我都講解下先，條例係咁講嘅：
「僱員可憑註冊中醫在診治後所發出的醫生證明書，享受《僱傭條例》內賦與工友的相關權利，包括病假津貼、生育保障和因身體健康問題離職可享用的長期服務金等等。」
重點係「註冊中醫」呢四個字，意思係列於中醫註冊名冊內，並已根據《中醫藥條例》註冊嘅人士，其他就只屬於表列中醫或未經註冊嘅中醫，換言之由未經註冊中醫所發出嘅醫生證明，係唔會獲得法例承認，上網click幾個掣就check到㗎喇。
Dennis呢張醫生紙就係由「表列」中醫發出，我唔知大家睇到呢度會覺得上司麻Q煩定係覺得Dennis有心玩嘢，只能夠講揸正嚟做的話，嗰張中醫嘅醫生紙的確係冇得拗，Dennis如果正正經經睇西醫或者註冊中醫就冇咁多手尾跟。
過咗幾日，年少氣盛嘅Dennis粒聲唔出就打返嚟話辭職，正路當然係一個月通知，或者賠一個月人工，不過Dennis完全唔理，打返人事部話唔做就唔做，亦唔會賠人工，最估唔到係我哋上司話算數唔追究，佢話反正都想炒Dennis，而家個麻煩友自己走，唔使賠嚟賠去咁煩，我覺得算係咁啦，好嚟好去，唔好阻大家搵食。
點知你唔搵佢麻煩，佢竟然留低一大堆麻煩，我哋早前幫客戶印嘅小冊子唔見晒，當時趕住交貨，封面係特別紙要另外訂，而Dennis仲剷埋電腦入面部分file，好明顯係想報復。
我哋打過畀Dennis，佢最初有聽電話同埋覆msg，仲講明咁做係要玩殘上司，要令上司孭鑊，我哋解釋咁樣係唔會搞到上司，只會搞到其他同事，Dennis唔聽，之後再block晒我哋，無辦法聯絡到佢。我哋喺無計可施之下，唯有訂紙再印過，又再contact designer拎返啲file，技術上係冇乜問題，但出貨就遲晒，當然亦要額外用多一筆錢啦，你估個上司會落手落腳做咩？最後咪又係幾個同事捱義氣OT補鑊，根本就殃及池魚。
Dennis一直捉住中醫醫生紙不被承認嘅問題去講，話自己好嬲，話被上司針對，其實我都後生過，我都反叛過，但如果你真係有心請假，又唔想畀人搵到位入，應該一早睇註冊中醫吖嘛，而家揸正嚟做公司仲可以追究好多嘢，何必影響埋無辜嘅同事呢？
其實以Dennis呢種火爆性格，出到去再撞板嘅機會絕對唔細，唔係話打工就要卑躬屈膝做隻狗，但至起碼要做好本份先。職場上面多一個朋友好過多一個敵人，呢鑊嘢佢嘅敵人唔止上司一個，仲得罪埋全team同事，第時有工想介紹都唔敢搵你喇，希望Dennis會成熟啲啦！
投稿讀者：Orange
《備註》
註冊中醫名單可在此網址查閱：http://www.cmchk.org.hk