屙尿屙出界係最易令情侶間爭拗

男女朋友或者夫妻經常會為生活瑣事鬧交,但你可能未必估到,其中一個最常出現嘅爭拗點係-----屙尿屙出界,今朝我個男同事就係衰呢樣。

「老婆發晒火,勒令我以後要坐低屙,喂男人嚟㗎!坐低屙當我係女人咩!有尊嚴㗎!」

語畢,全體女同事群情洶湧,嗰位男同事即刻用眼神望向我求救,明白嘅!我哋係公司裡面僅餘嘅兩位男性,就等我用學術性去分析啦!

其實男人想準確地小便,唔會搞到周圍都係,的確係一件好難嘅事,因為當中包含咗物理因素,圖中嘅「d」係代表拋物線弧度,「h」就係男人嘅高度,簡單啲講,一個人愈高,小便嗰陣出現嘅「d」就會愈大,另外「v」係水平速度,日本有研究指出,尿嘅速度可達到40 ml / 秒,有時快有時慢,取決於你忍咗幾耐先去,急咗好耐就梗係極速傳說啦!

身高雖然係固定,不過有幾急就話唔定,換言之每次都好難準確拿捏孤度同速度,射到出晒界就係咁解。

其次可能係有病,例如小便時射出兩行……千祈唔好忽視「Double水龍頭」,呢個係尿道收窄嘅訊號,間唔中一次半次尚可,但經常出現就可能係有前列腺疾病,記得要及早睇醫生!朝早第一次小便就更加唔準,因為男人好多時有晨勃,形狀同硬度唔同咗,自然就難以控制。

就算以上情況都冇出現,小便亦唔一定射得準,日本仲有研究測試指出,男人每次小便所彈出嚟嘅微細水花有7500滴咁多,何況不論男女,小便嘅速率都係由快到慢,由一開始好洶湧,去到尾聲變滴滴仔,即係墮落嘅位置會不斷轉變,所以企喺度屙到周圍都係根本就意料之內。

唔知係咪以為我讀泌尿科😂

所以我嘅結論係~~~如果你一個人住,間屋係你嘅,你鍾意點屙咪點屙囉!話之你扭住腰咁屙,好似花王灌溉咁啦!開心的話射埋上洗面盆都得㗎,自己一個住梗係你話事啦!

但如果你同人住,無論對方係你老婆、女友、朋友、家人,或者係分租嘅roommate,不如考慮下坐喺度屙啦!體諒下別人,屙到周圍都係的確好唔衛生,下一個去嘅時候隨時唔小心踩到,甚至坐低會「hi」到,己所不欲勿施於人,你掂到人哋啲尿都唔好受啦!

好似我同事咁,覺得男人唔應該坐低小便,堅持要企喺度屙的話,咁最低限度要做一樣嘢,就係小便過後記得要抹乾淨,包括廁所邊框、地下,仲有廁板個底部,其實成件事咪仲麻煩過企喺度屙。始終係屋企廁所嚟㗎!你要尊嚴啫,hi到你啲尿嘅人難道唔使尊嚴咩?

男同事聽完之後話:「唉,真係麻鬼煩!」

「咁你咪落公廁屙,踩其他人啲尿囉!」

Facebook原文

上一篇兩性文章:女朋友係全球經驗發展絆腳石

error: