結婚 ,慳到擺酒都未必慳到禮金!

今日收到餅卡同埋生果籃,又有一pair男女會員宣布 結婚 喇。雖然佢哋唔擺酒,但係冇咩所謂啦,反正疫情下愈多儀式愈麻煩,最緊要白頭到老,永結同心。大家拆生果籃嘅時候,老細忽然問:「而家啲人唔擺酒,禮金會畀多啲定係畀少啲呢?」

有個女同事答:「咁就睇下女方阿媽點諗喇,我阿媽係一個崩都唔會收少。」

咁重怨氣,原來呢位女同事8年前有打算同個ex結婚,佢私底下問咗自己阿媽想收幾錢禮金,佢阿媽話:「18萬!」

女同事:「我同個ex嗰陣咁細個,邊有咁多預算呀?當年咪同阿媽炒大鑊囉!」

我:「最後因為禮金傾唔掂數所以分手?」

「咁又唔係,因為其他事分開,只係想講有啲人似賣女多過嫁女啫。」

老細:「但你同而家個男友都拍咗好多年拖喇喎,有冇打算結婚?如果結婚,又要再同你阿媽傾禮金問題。」

女同事:「傾咗啦,我哋諗住疫情擺唔到酒,順勢結婚慳返酒席,點知我阿媽喺咁嘅環境下又係企硬收18萬,仲話唔擺酒慳咗酒席,禮金更加唔可以少喎!唉,都費事傾落去。」

老細:「又唔使咁勞氣,你向好嗰方面諗,伯母好有良心㗎喇,8年嚟從來冇加過價,26歲嘅你收人18萬,34歲嘅你又係收人18萬,伯母係良心商人,你個價好硬淨。」

Facebook原文

上一篇兩性文章:兩個人一齊 話題永遠都在

error: