雖然我唔知咩叫時鐘酒店，又唔知咩叫開房，不過見你個投稿幾吸引，希望你講多啲啦。
投稿讀者：婉儀
＝＝＝＝＝＝＝＝＝＝＝＝＝＝＝
睇咗你個page好耐，不過facebook冇得投稿，請問係咪返寫字樓工先可以分享？如果係唔緊要，當睇完算啦。
小妹三十幾歲，喺九龍塘某一間時鐘酒店返工，主要係坐喺接待處幫嚟開房嘅人登記資料同收錢，有時唔夠人手都要煮下餐蛋麵，腿蛋麵，因為我間時鐘酒店有得叫嘢食。呢份工係我一個姐妹介紹，做咗差唔多3年喇，其實都幾頹，不過就好輕鬆，執房由另外一啲嬸嬸負責，所以做落又好懶再轉工，何況我已經結咗婚，實在冇咩事業心，輕輕鬆鬆人工一萬頭夠用就算。
雖然呢間時鐘酒店得兩層樓高，返工嘅感覺就好似困喺人哋間獨立房別墅做管家咁，不過短短3年就見盡人生百態，我哋同事之間感情亦都好好，日日有講有笑，大家平時都係用手機煲下劇打發時間，再唔係就研究下嚟開房嘅人，咁又一日㗎喇。
我間時鐘酒店規矩係只可以一男一女租房，唔容許佢哋玩多P大混戰，不過區區幾百蚊三個鐘，又點攔得住呢班「有心人」，一女兩男，一男兩女，呢啲都司空見慣，而兩男兩女一齊入嚟就最多，但係佢哋普遍都好識做，通常一入嚟就會租兩間房，最後當然係四個人入晒一間啦，平均一個星期梗有一兩單。
心情最複雜係見過一個頂盡24、25歲嘅女仔，佢先同一個阿伯嚟開房，其實一睇都知佢哋係純粹金錢交易，過咗陣就會另一個阿伯嚟自己租房，登記完都冇入過自己間房，而係直接去叩剛才女仔同另一個阿伯嘅房門，即係少女大戰兩個阿伯啦！最初我擔心個女仔係咪自願，點知同事話呢個女仔唔係第一次㗎喇，人哋做生意。做落咗真係發現呢個女仔成日嚟同阿伯玩，有時係一對一，一時就好似啱啱個情況咁樣一女vs兩個阿伯，由當日大開眼界，到今日睇到已經冇晒感覺，只係覺得好可惜，個女仔咁後生，點解要咁呢？喺香港如果肯做，點會搵唔到工。
不過我想講一件好滾動嘅事，某次有兩個男人揸車嚟，泊完喺我哋時鐘酒店門口個停車位之後，就兩條友夾住個女仔嚟開房，個女仔已經醉咗，但仲有輕微反抗，因為當其中一個男人向我登記嘅時候，另一間男人扶住個醉咗嘅女仔喺後面，個女仔一直講要返屋企，重覆咗幾次，我未諗到點做好，只係本能講咗句唔可以兩男一女開一間房，嗰兩個男人就開始發惡喇，講晒粗口鬧我，又話「咁咪開兩間房囉，再唔係三個人三間都得，你鍾意啦！畀錢之嘛，醒目啲啦！」
跟住我就話個女仔醉咗，唔知佢係咪自願，嗰兩個男人就好凶咁話要打我，我另一位同事仲有門口個巴基斯坦伯伯看更都衝咗過嚟，我哋幾個指住頭頂個CCTV話影低晒，巴基斯坦伯伯看更再用啲唔純正嘅廣東話講已經報咗警，嗰兩個男人竟然就咁擺低個醉咗嘅女仔喺地下，冇錯係地下，就咁擺低佢就走，一路行一路講粗口，又話叫我哋小心啲。
後來我哋拍極個女仔都仲係好醉，安置佢去最近嘅一間房，過咗陣已經有警察嚟喇，細節就唔方便透露喇，總之個女仔隔咗兩三日返嚟時鐘酒店搵我哋，買咗啲西餅講多謝，呢次係我咁耐以嚟第一次對份工作有成功感，講真初入職時自我形象幾低，甚至唔好意思同朋友講喺時鐘酒店返工，其實每份工都有貢獻，一樣可以做好事。
我仲見過一啲半紅不黑嘅所謂明星嚟開房，真係叫唔出佢哋個名，同事間都係話：「呢個咪之前套咩咩扮跟出跟入嗰個囉！」但係我有一次遇到個超級靚仔，不過都係嗰句，唔肯定你係咪只會登辦公室故事，你有興趣我先再講埋畀你聽啦！或者有冇一啲關於時鐘酒店嘅嘢好想知？我都好樂意分享。
＝＝＝＝＝＝＝＝＝＝＝＝＝＝＝＝＝
婉儀投稿
《第一回》女仔唔好亂飲醉
http://hkofficedaily.com/?p=4208
《第二回》花美男
http://hkofficedaily.com/?p=4218
《第三回》幸福要靠自己爭取
http://hkofficedaily.com/?p=4222
《第四回》睇人唔好睇表面
http://hkofficedaily.com/?p=4231
《第五回》菲菲 1
http://hkofficedaily.com/?p=4240
《第六回》菲菲 2
http://hkofficedaily.com/?p=4199