有個Marketing朋友仔問：「上次時鐘酒店個投稿，你有冇考慮唔登第二回？」
我：「點解？」
「有啲廣告商唔鍾意，可能驚同產品唔夾。」
我：「職業無分貴賤，我甚至收到性工作者投稿，遲啲都會登。」
「你唔怕冇廣告收入？」
我：「怕，但更怕個page冇營養，冇屬於打工仔嘅真實故事。」
所以望穿秋水嘅第二回，仍然照登，咁多hater，你就得邊個？做自己便可。
＝＝＝＝＝＝＝＝＝＝＝＝
投稿讀者：婉儀
餐廳有熟客，時鐘酒店一樣有，不過通常只有其中一方係熟客，佢哋帶嚟嘅另一半就唔係。
欠你哋一個關於靚仔嘅故事，以前呢位花美男成日嚟，最近3個月已經冇見過喇。目測身高190，唇紅齒白，天生一副明星相，皮膚好似韓星咁白淨，連髮型都似，可能我自己鍾意睇韓劇啦，又或者佢刻意模仿，容許我偏頗地講一句，呢條仔近乎零死角，真係點睇都咁靚仔……總之好想食咗佢。
佢本來就令人念念不忘，何況仲要平均兩星期就嚟一次。
從來冇正面同呢位身高190嘅花美男傾過計，佢嚟我時鐘酒店嘅方式不外乎3種，一係女伴嚟先，佢殿後；一係同女伴一齊嚟；另外就係佢自己登記上房先，女伴稍後自己嚟。有一次佢先抵達，無可避免要畀身份證我登記－－－1997年出世！🤦🏻♀️香港回歸嗰年我中五畢業做第一份工，眼前呢位花美男先至剛剛嚟到呢個世界。
某次佢同一個闊太look女人嚟開房，我循例叫佢哋出示身份證登記（其中一個登記都得），再求其撩隻龜畀錢上得房，不過我開完聲之後冇人應我，唯有問多一次，花美男望住我講唔好意思，然後同闊太好溫柔咁講：「登記咗先。」
闊太怒睥我，好唔願意咁拎張身份證出嚟，頂你吖！條女1967年，難怪睥我嘅眼神咁凌厲，但我都係做嘢啫，點知花美男呢行有啲咁嘅規矩，同客一齊嚟就要個客登記身份證啫！何況你都上房嘆小鮮肉happy happy啦！寬容啲！嗱嗱聲開餐好過啦！
每次同花美男嚟開房嘅女人，就算每隔一期會唔同咗，但始終有兩個共通點不變，就係做得佢阿媽，同埋銀包有好大疊Cash，嗰次個闊太畀完身份證我再畀房錢，佢銀包入面啲Cash厚到嚇親人，應該有接近兩塊西多士咁厚。
近幾個月已經再冇見到花美男喇，唔知佢係咪已經轉咗行，好可能已經搵到一個闊太做長期飯票，從此上岸嘆世界，又或者純粹轉咗另一間時鐘酒店，大家緣慳一面。除咗年紀之外，我真係唔知花美男太多背景，不過家家有本難唸的經，每個人選擇佢嘅職業都有自己嘅原因，特別喺香港，呢個地方一向都笑貧不笑娼。
不過講起好笑，早排有個男仔同另一半嚟開房，登記嗰陣問我有冇避孕套賣，我話每間房都有兩個，租房送嘅。個男仔當時咁嘅反應：「得兩個咋？唔夠可唔可以再攞？定係要錢買？」
「唔夠就打0字啦，我哋再拎畀你。」
過咗15分鐘，佢真係打0字，不過係佢嘅女伴打嚟：「請問你哋有冇M巾賣呀？」
再過多陣，佢哋就退房走喇，間房嗰兩個免費避孕套仲喺度😂😂😂
我真係好鍾意呢份工，太多嘢睇喇。
＝＝＝＝＝＝＝＝＝＝＝＝＝＝＝＝＝
婉儀投稿
《第一回》女仔唔好亂飲醉
http://hkofficedaily.com/?p=4208
《第二回》花美男
http://hkofficedaily.com/?p=4218
《第三回》幸福要靠自己爭取
http://hkofficedaily.com/?p=4222
《第四回》睇人唔好睇表面
http://hkofficedaily.com/?p=4231
《第五回》菲菲 1
http://hkofficedaily.com/?p=4240
《第六回》菲菲 2
http://hkofficedaily.com/?p=4199