公司裡面有冇一啲人，係你發現到佢醜陋嘅一面，而其他人係睇唔到？
上司話：「隔離team阿Jack幾好人喎，問佢嘢都好幫手。」
我hea應一句：「係咩？」然後繼續做嘢。
你係manager grade，梗係對你好啦！事實上，我見過呢位阿Jack鬧茶水姐姐洗佢隻杯唔乾淨，又有次公司個外判清潔工人8:50分吸緊塵，阿Jack直情大聲喝斥話好嘈，再以好兇狠嘅眼神睥到實。
我明白佢早咗返工一定為call客或者call candidate，當日我都係因為呢個原因而早返，不過人哋外判工人點知你咁多嘢，佢都係跟合約同埋上頭指示啫，你簡單講句去吸第二度先，或者今日唔使吸住咪得囉，使唔使大聲喝人呀？
唔止一個新人同我講過，有工作搵阿Jack交接係好麻煩嘅事，因為對方態度傲慢又串柒柒，而我上司見到嘅就係另一面，呢一面我都見過，逢例會就見到佢對住其他team head同埋老細笑得好燦爛，所以連我老細都對佢讚不絕口。
當然每個人喺工作上都有自己嘅生存之道，我上司同老細覺得阿Jack好nice好helpful，咁咪由佢哋囉，我就唔識欣賞喇。
對老細好、對客好，仲有對其他職位更高嘅人好，或者係因為可以從中獲得好處，例如工作上嘅便利同埋實際利益，如果想知道真正嘅人品，應該睇佢點樣對待基層嘅人。