件事係咁嘅，我同事上年話佢剛畢業嘅細佬要搵嘢做，但我當時手上真係冇一份job係for fresh grad，適逢有個朋友間公司要搵junior，真係零經驗都得，咁我就做個順水人情，介紹咗同事細佬去我朋友度做喇。
今日我突然收到呢位朋友Whatsapp：「代我問候你同事啦，跌親可大可小，我有個相熟跌打師父幫好多香港甲組球員睇症，好好㗎，不過打畀佢細佬冇人聽，可能係照顧緊你同事，我影定跌打師父張卡片畀你先。」
我望一望隔離位個同事，再望一望佢隻腳：「你跌親咩？」
同事：「冇呀，做咩？」
「我朋友，即係你細佬個阿head，佢話介紹個跌打師父畀你喎。」
同事未聽我講完就打畀佢細佬：「你個仆街仔又請假呀？可唔可以唔好再咒屋企人呀？」
根據我同事描述，佢細佬由上年9月返工到而家3月，阿媽病咗一次，阿爸病咗兩次，佢腸胃炎同發高燒各一次，而家又跌親腳一次，仲有屋企爆水喉一次，畀賊仔爆格一次。
「咁Uncle同Auntie身體好嘛？」
我同事：「佢哋呢段時間冇病過。」
「有冇諗過提名你細佬攞傑青？」
＃以上淨係計佢知嘅事
＃應該唔止病咁少次
＃全家都好唔健康