少少事務宣布，由於婉儀實在太慷慨，分享咗好多佢做Love Hotel嘅所見所聞，所以我決定發放返四篇稿費畀婉儀，好嘅文字係有價有市，我個人都曾經有被壓榨嘅經歷，己所不欲勿施於人，唔應該助長免費午餐同埋做爛市風氣。
今後所有讀者投稿若然被刊登至facebook同IG，全部都會有稿費，敬請投稿讀者留聯絡電話或者email，至於投稿網址同細節已經喺文章尾部列出，希望多啲聽到各行各業嘅故事，等緊你哋❤️
＝＝＝＝＝＝＝＝＝＝＝＝＝＝＝
嚟得Love Hotel嘅客都係尋開心，無論佢哋係情侶關係，偷情關係，定係畀錢買服務嘅關係，只要係你情我願，冇任何犯法或者夾硬嚟嘅行為，我哋真係管唔到咁多，五星級酒店都一樣，絕對冇分別。
記得有對斯文情侶，相貌唔突出，兩個都戴眼鏡，衣著偏向老土，如果唔係出現喺Love Hotel，你話佢哋教書都大把人信。咁普通都記得，除咗佢兩個平均一星期嚟一次之外，後來仲發生咗一件事，有次佢哋退房，等緊我找返100蚊按金（我哋入房前除咗收房錢，仲會象徵式收100蚊按金），清潔姐姐喺二樓叫落嚟：「漏咗嘢呀！」
呢對情侶若有所思諗緊漏咗咩，清潔姐姐落到嚟就遞出一對手扣同一個口塞：「條毛巾衾住咗呀。」
佢兩個紅都面晒，特別係嗰位女士，其實唔算咩咁大不了，曾經有客漏低成袋SM用品喺度，入面啲玩具再誇張十倍，但可能太尷尬，又要顧形象，之後就冇再見過佢哋喇。
著西裝就斯文？返教會就好人？講粗口就係壞人？著得少布就代表Open？呢啲純粹係社會上嘅世俗眼光，喺Love Hotel返工嘅經驗話我知，所有嘢都唔好睇表面，而且離遠睇一定唔清楚，未認清之前唔好妄下定論。我見過生得好普通嘅女仔，你喺街絕對唔會望佢一眼嗰隻，但佢隔兩三日就會帶唔同嘅男仔嚟開房。
成日聽到人話：「娶老婆唔使娶個咁靚㗎！一陣佢畀綠帽你戴就慘，娶個斯斯文文，普普通通就得喇。」其實唔一定要靚先會派帽，因為男人最鍾意其實係乖得嚟又識得姣嘅類型。
同樣例子喺男人身上都會發生，有一pair情侶成日嚟，我諗都持續咗一年喇，所以認得都好正常。有人問點解我知邊對係情侶？邊對係偷食？你做得耐自然分得出，態度同身體語言係會有好大出入，我指喺其他人面前，當然入到房都係一樣啦！有一次見到呢個男仔拖住另一個女仔嚟，後生仔女換畫都好正常嘅，誰不知再隔一個星期，佢又同返之前個女朋友嚟，再隔一排又見佢拖新女仔嚟，但點都會恆常地同佢正印又嚟，梅花間竹咁，就更加容易分到係咩關係。
咁多女伴，個男仔係咪型英帥靚正？絕對唔係，一個招牌跌落嚟壓死幾廿個嗰種，所以真係冇樣睇，奉勸大家如果認真發展一段感情，要用多啲時間去了解同認清對方，要睇真啲，有時你以為佢係電話，實際上係鬚刨，你以為佢係鬚刨咩，但可能又係風筒，當你以為佢係風筒，其實又係一個鬚刨。
兩個都係玩玩下就冇嘢好講，最怕一個認真，一個係玩，第日傷心固然唔好，怕對方惹埋啲唔知咩病畀你仲大鑊，記住睇人唔好睇表面。
＝＝＝＝＝＝＝＝＝＝＝＝＝＝＝＝＝
婉儀投稿
《第一回》女仔唔好亂飲醉
http://hkofficedaily.com/?p=4208
《第二回》花美男
http://hkofficedaily.com/?p=4218
《第三回》幸福要靠自己爭取
http://hkofficedaily.com/?p=4222
《第四回》睇人唔好睇表面
http://hkofficedaily.com/?p=4231
《第五回》菲菲 1
http://hkofficedaily.com/?p=4240
《第六回》菲菲 2
http://hkofficedaily.com/?p=4199
＝＝＝＝＝＝＝＝＝＝＝＝＝＝＝＝＝
投稿細節
投稿可使用以下網址
http://bit.ly/2OKZ0Nx
首先，好重要嘅一點，呢度係匿名投稿 (畀個稱呼我就得喇~)，唔使驚有人秋後算帳，你可以決定淨係同我傾訴，亦可以選擇同大家分享，總之一經轉載至facebook或IG都會有稿費，但係會唔會刊登就真係視乎你嘅真人真事有幾吸引，如果冇被轉載，希望你會見諒。
假設你選擇可以喺辦公室日報轉載，就代表同意並授權辦公室日報使用以下資料作任何形式轉載、公開發佈、出版或者發行。請盡量留電話或email聯絡，否則畀唔到稿費你，感謝你哋呢班打工仔支持！🙏🏻🙏🏻🙏🏻
PS：圖片不知出處，請見諒。
再強調多一次，我比較少睇inbox，而且inbox我有同事負責睇，所以各位投稿請投去信箱，得我一個睇，可以保密好多❤️