我一直都好想養狗，以前有個朋友去外國Training，交低咗佢隻Poodle畀我照顧，嗰段時間超開心，之後都好想自己養，但衡量過各方面嘅條件，覺得未係時候，因為我知道養寵物絕對唔係貪得意，而係要負責任，要花時間陪佢。
最近搬屋，環境好咗，空間大咗，我成層樓有8戶，有7戶都養緊寵物，唯一一戶冇養就係我，因為要好謹慎去評估自己得唔得，唔可以一時衝動，唔可以玩玩下。
我開始問身邊養狗朋友嘅意見，更加做咗好多資料搜集準備領養，總之大原則就係唔買，只會領養。點知今日有個朋友打嚟，問我可唔可以接收佢隻狗仔，本來應該開心，但我聽到佢棄養嘅原因就嬲到噴火。
佢之前係為咗氹女朋友去買狗，點知用嚟upload上social media呃完like之後，而家竟然話：「教咗咁耐都唔識去邊度屙屎屙尿，早兩日屙尿喺張床，已經教到筋疲力盡，我女友話唔想再要。」
喂，生命嚟㗎！呃like嗰陣你識利用佢，照顧佢生活就嫌麻煩？你有冇人性㗎！
聽講佢女朋友因為見好多人post狗狗相，覺得好得意，好多人like，所以最初先想養狗，真係唔該晒！
好多人post可愛寵物相上網，冇話你聽背後要點樣訓練佢去廁所、平時點樣打理同照顧佢起居飲食、有病嘅時候點做、睇獸醫要幾錢、隻狗係買返嚟定領養、如果棄養會令到貓狗幾慘……唔好憑一句：「好得意呀！」、「好多人like呀！」、「好想同佢玩呀！」然後就好衝動去買寵物，你會毀咗佢一生㗎！
對於冇責任感嘅人嚟講，你哋對寵物最大嘅欣賞同埋愛，其實就係唔好養！高抬貴手Please！
＃真係好難唔激動
＃要下咗啖氣先再去同佢傾