能夠令一個人後悔 通常唔係做過嘅事

有個識日文嘅朋友,以前成日想不顧一切去日本生活同埋工作,但隨住年紀漸大,呢個諗法已經冇以前咁強烈。最近佢quit咗份工,apply咗幾間公司,包括喺linkedin上面一個station東京嘅職位,結果好好彩地interview過關,而同時又有兩間香港公司請佢。

手握3個offer,東京嗰份人工最少,比起兩間香港公司分別少25%同30%,而且係一年合約制,唔係Permanent,所以佢打算放棄,現實歸現實,人愈大就愈多顧慮,唔似後生時拍下蘿柚想去邊就去邊,鍾意做咩就做咩。

佢問我有咩意見,我話既然未有另一半咪試下囉,賺少啲可以食少啲啫,Lawson雞扒都幾正吖,慳啲使不過可以圓夢。

我朋友擔心人哋下年唔renew合約,佢唔知返香港好,抑或喺當地再搵工好,就算係深愛日本文化,都要諗食飯、生活,仲有前途問題,何況有兩個人工更高嘅offer,日本職場又出晒名壓力大,旅行同工作係兩碼子嘅事,總之就驚做錯決定,驚會後悔。

我同佢講,能夠令一個人後悔,通常唔係做過嘅事,而係一直想做又冇去做嘅事。

然後,佢accept咗日本公司個offer。

突然覺得好大責任,但係呢句~~~「能夠令一個人後悔,通常唔係做過嘅事,而係一直想做又冇去做嘅事」,真係我自己嘅寫照,所以希望呢位朋友下個月去日本一切順利,最緊要係
.
.
.
.
有咩事唔好怨我🙈

error: