女朋友 嘅飲食喜好你記住了嗎?

我十分了解 女朋友 嘅飲食喜好,例如佢唔鍾意食青瓜,唔鍾意食鰻魚,唔鍾意食芋頭,仲有唔食得辣。

其實我女友係一個好女仔,十分慳家,舉例去餐廳食嘢,一個set連主菜有薯條餐湯飲品,佢會選擇單嗌,而如果啲套餐係唔同價錢,佢一般都會order最平嗰個。

每次女友話單嗌,我就會勸佢:「唔好啦,差少少之嘛,有埋薯條餐湯飲品唔係仲抵咩?」

跟住佢會答我:「唔啦,都唔係好肚餓。」

而每次佢order最平嘅套餐,我亦都會勸佢:「唔好啦,A餐個意粉好普通,你唔係鍾意食扒咩?D同E好似幾正喎!」

然後佢又會答我:「唔喇,都冇胃口。」

你哋知道嘛,每次我都好驚呢個情況出現,因為當個餐嚟咗之後,佢就會食我啲薯條(佢大約食3分2左右啦),飲埋我杯嘢(半杯一定走唔甩),小姐,點解你最初要單嗌呢?都話一人一個set㗎啦!Everytime佢唔嗌set,亦代表住我會冇咗個set~~

好喇,每次佢鳩揀咗個餐,跟住就會喉住我個餐,所以最後變咗佢食我個E餐,我就要接手佢個A餐意粉,一早話一人一個扒㗎啦~~

不過叫唔叫set都好啦,我女友都習慣性地喺啲食物嚟到之後講一句:「嘩,你嗰個好似好食啲喎!」又或者:「你杯嘢好飲啲喎!」

其實我個set同埋我杯嘢飲未必真係正啲,只係我女友永遠都覺得隔離飯香,無論你叫啲咩,佢都係想同你交換(正確嚟講唔係交換,係搶掠),所以無論出街食飯又好、叫外賣又好、就咁叫珍珠奶茶又好,我都十分關注佢叫咩,即使我哋都係叫杯鮮奶咖啡,我叫凍,佢叫熱,嚟到之後佢一樣會後悔叫咗杯熱飲,夾硬要換我杯凍飲。

作為男朋友,我一直牢牢緊記佢唔鍾意食咩,去日本餐廳有機會就叫鰻魚飯,如果去譚仔就一定會叫中辣,只有咁樣,我女友先至唔會想交換或者搶掠我啲食物。

Facebook原文

上一篇兩性文章:結婚 ,慳到擺酒都未必慳到禮金!

error: