多年前幫一間藥廠搵人，係一個專業職位，結果我喺LinkedIn搵到去台灣，終於遇到個條件非常吻合嘅人，但呢位台灣專業人士（下稱簡先生）不為所動，我亦唔勉強對方，反而大家討論行情嗰陣變咗朋友，耐唔耐會傾計同問候。
最近簡先生同我講，大半年前有另一位香港嘅獵頭撬佢，又係同一間香港藥廠，offer仲好過幾年前，但佢依舊拒絕，嗰位獵頭問：「香港年薪是你目前的三倍，為甚麼一定要留在台灣呢？」
簡先生答佢：「因為我家人在台灣呀，不希望離他們太遠。」
獵頭：「但我在LinkedIn找到你，你不是open for new opportunities嗎？」
簡先生：「我LinkedIn的檔案不一定用來找工作呀，就算是找工作，我不能target台灣的公司嗎？」
聽簡先生講，呢位獵頭初時發爛渣，及後又想用軟功氹佢send份CV過嚟，不斷以香港人工高過台灣好多呢個point去游說，又表示唔明點解佢唔肯嚟香港工作？人工明明多幾倍，點解要同錢作對？
我都幾了解簡先生嘅背景，佢太太係高雄人，親戚就住台南，簡先生最enjoy同家人相處，就算喺台灣境內周圍去都好開心，當年仲send過同老婆去綠島旅行嘅照片畀我睇，叫我人生點都要去一次綠島。
每個人追求嘅金錢收入、工作模式，仲有理想生活都有唔同標準，台灣平均收入低於香港，但佢哋嘅物價指數冇香港咁高，單單比較帳面邊個人工高啲係冇意思。
做體育記者嗰陣，球星嘅人工我都知得好清楚，唔出名或者年青球員都幾千英磅人工，講緊周薪喎，唔係月薪，出名球星一個禮拜人工已經係普通人嘅年薪，當然佢哋仲要交好多稅啦！但咁又點呢？一樣有大把球星破產嘅新聞，所以咩為之多，咩為之少，其實好睇心態、環境，仲有自己嘅理財方式。
簡先生同我講過，佢自己太鍾意台灣，太唔捨得屋企人，冇人唔恨錢，不過好多嘢比起錢更加重要，簡先生仲話之前其實有獵頭搵佢去中國工作，人工比起香港呢份仲高，但自己一樣拒絕。
我：「不想離家太遠，然後拒絕吧？」
簡先生：「不是，我跟那個中國的獵頭說，台灣人都用facebook，如果我去中國就不能用了。」
我：「他沒有教你翻牆嗎？」
簡先生：「有，我説翻牆沒意思，自由的空氣不一樣。」