最近有個舊客同我講：「本身想升一位下屬，但對方竟然話唔想升，仲反問可唔可以淨係加人工，我話唔係唔得，只係title冇升，加幅會冇咁大囉！我真係唔明點解會有人唔想升職，你張卡片印住senior或者manager都威啲啦，佢30幾歲喇喎，唔覺得咁樣係不求上進咩？」
我：「人各有志啫，其實對打工仔嚟講，Title如浮雲，最緊要加薪。」
「我明，但佢唔想升職嘅原因係唔鍾意管人，唔想做management，你估佢係咪打算過埋新年轉工？ 冇理由有得升都唔想升㗎喎！」
我唔知舊客個下屬點諗，不過唔鍾意管人，唔想做management，呢一點我絕對理解，點會冇理由呢？我自己就係呢種人。
做headhunt嗰陣本來開開心心，後來公司話要升我，人工係多咗，不過孭數都重咗，當時老細話要請兩個人跟我，我第一句都係答：「唔升得唔得呀？」
Management係另一種學問，唔係話冇大志，不過人人性格唔同，我最憎管人，本身份工已經好忙好大壓力，連照顧自己都分身不暇，真係冇興趣再帶住兩個人，如果我有時間，寧願將心力擺喺私人生活，家人同朋友都未得閒照顧，你唔好要我管同事啦！
性格使然，唔關上唔上進嘅事，邊個set條界線去到某個年紀唔做管理層就代表失敗？畢竟升職後同事之間多少有啲變化，唔係每個人嘅外交手腕都咁強，世界上真係有一部分人好唔鍾意搞人際關係。
名利名利，總有人要名唔要利，亦有人要利唔要名，當然仲有人係追求名利雙收，我喺headhunt公司見過唔少同事升職後愈做愈頹，亦有人愈做愈起勁，你承受得起，處理得到，咁咪冇問題囉，公司始終都要有人上位，無奈我自己就係愈做愈頹嗰個，下面兩個妹妹仔性格鮮明，多愁善感（我用詞係咪好溫和😂），對公司同埋大老細都有好多不滿，呢啲反應我完全明白，因為我一樣做過junior，問題係要照顧佢兩個感受唔容易㗎，一人分飾上司同心理導師兩個角色真係吃不消，更深深體會到management角色唔啱自己，因為我所追求嘅係夠鐘收工準時出糧，然後再發展其他興趣，呢條路同埋呢種生活先係我嘅信仰，性格問題，冇辦法。
世界上冇一份最好嘅工作，只有適合自己嘅工作，人生亦冇一條最好嘅路，只有適合自己嘅路，所謂「成功」、「失敗」、「上進」，唔係用卡片上面印住嘅職銜去作定論。
Title好死㗎咋，你去商業登記處開間公司，出張BR要幾多錢吖，鍾意叫自己做CEO、COO、UFO，甚至係亞太區最受歡迎男歌手都冇問題，不過出信用卡同埋買樓批按揭呢啲實際嘢咪又係要睇人工同積蓄，所以我個人而言都係覺得Title如浮雲，最緊要加薪，當然人人所追求嘅嘢都唔同啦！