我、Judy、Chris，呢個2女1男嘅組合係同期入呢間公司做，所以3個新人最初關係都幾close，公司其他同事仲有個男上司亦好好人，雖然平日工作真係幾忙，不過整體而言確實做得幾開心。
後來有一日Judy嘅行為有啲反常，lunch返嚟之後粒聲唔出伏喺張枱度抽搐，了解後先知佢喊緊，其實出去食飯嗰陣已經聽到佢同男朋友傾電話鬧交，Judy中途走出餐廳外面傾咗好耐，搞到所有人食晒之後要等佢返入嚟食埋嗰半碟飯。
Chris關心下佢，問下佢係咪ok？Judy就好躁咁喝人哋唔好咁煩，又叫Chris唔好理佢，我覺得Judy嘅態度係有問題，你同男朋友鬧交唔應該搵人出氣，何況Chris都係好心慰問你啫！
見到Judy咁唔好老脾喝阿Chris，咁我哋其他同事都識做，就係由得Judy，費事問多兩句又無端端向我哋發脾氣。
其實你同男朋友鬧交心情唔好，我哋係可以理解，只要唔影響到其他人就得，偏偏Judy就令到成個office嘅氣氛好怪，當日接近放工嗰陣，佢忽然喺個位大嗌一聲：呀！
同事被Judy突如其來嘅鳩叫嚇親，我坐隔籬差啲倒瀉水咁滯，無奈之下都要係咁易問佢咩事，Judy完全冇答我，拎住部手提電話一支箭標咗出office，直至放工我都冇再見到佢。
第二日從另一位女同事口中得知，原來Judy去咗女廁嗰邊個後樓梯講電話，全程好大聲同男朋友隔空開火。後樓梯因為好大迴音，Judy同男友鬧交嘅聲浪後來驚動埋大廈個實Q，女同事話見到實Q上咗嚟眼望望，最後有冇勸Judy唔好咁大聲就唔知喇，因為嗰位去廁所嘅女同事都趕住放工走人。
跟住連續幾日都係咁上下，Judy嘅狀態同情緒都差唔多，時而大嗌，時而伏喺枱唔知喊定休息（辦公時間），keep住出出入入office，因為佢忙住去後樓梯同男朋友隔住電話鬧交。
除此之外，Judy嗰幾日仲係咁對住office啲死物發脾氣，大大力拍keyboard、一鳩飛開部計數機、掟筆（佢掟落自己個位啫，冇掟去人哋度）、拍鳩部電腦mon、無厘頭撕爛啲紙（好在唔係文件）、影完印好大力咁拍低copy machine個上蓋，呢下我真心驚佢拍爛部機塊玻璃……
其實公司有個人咁樣發脾氣，其他同事係冇義務承受，更何況你只係一個連試用期都未過嘅新人，明顯睇得出有啲人望住Judy嘅眼神係好不屑同埋厭惡，結果真係有隔籬team嘅同事走嚟向我哋上司投訴：「你話下佢啦，失戀大晒咩？」
而我哋自己team都有另一位同事反映過，佢就同上司講：「心情唔好冇問題，但係影響到人吖嘛！」跟手畀咗粒「P」掣我上司……乜嘢「P」掣？原來係keyboard上面嗰粒「P」！
Judy發脾氣成部計數機飛落張枱嗰陣擊中keyboard，粒「P」掣應該係受到猛烈撞擊而飛脫，飛咗去呢位同事腳邊，而呢位同事上次見到Chris慰問Judy最終被鬧，所以唔想同Judy正面講嘢，結果將粒「P」掣轉交畀上司，再叫上司出聲話Judy。
聽講上司不嬲都係一個好人，脾氣好，人品好，面對先後兩個人向佢投訴Judy之後，上司嘅回應只係：「小妹妹鬧下情緒啫，我估佢好快冇事。」
唔係叫你炒佢，不過係咪應該話下佢呢？最過份係Judy有一日做緊嘢突然唔見咗人，當時佢又係拎住個電話鬧交，又係發脾氣掟文具，跟住就走咗出office，由於一消失就唔見咗兩個鐘，我有特登去女廁後樓梯睇睇，但見唔到Judy，可能係落咗樓下嘈啩，真係唔知佢去咗邊，竟然可以返緊工走咗去。
Judy嗰次大約兩點半離開個位，最後5點半先返返嚟office，佩服佩服，返到嚟仲若無其事坐返埋位做嘢，全程嬲爆爆生人勿近。
呢個情況持續咗個幾星期，Judy及後回復正常喇，應該係同男朋友和好如初，返到公司終於有笑容，終於會正正經經做嘢，終於冇再掟文具同埋走出去後樓梯大大聲嘈交，仲主動搵我同Chris講笑，一切回到最初我哋3個新人入嚟公司嘅狀態。
不過就喺呢個時候，我同Chris都收到正式通知提早過試用期，反而Judy就過唔到，上司嗌咗佢入房傾，傾完出嚟就見Judy執嘢走。
Judy自己同我哋講，話好多同事投訴佢（之前喺公司發脾氣嘅行為），雖然Judy話自己已經向上司道歉，不過傳達畀佢嘅訊息係想留都留唔到，因為有人投訴到去老細嗰度。
Judy仲自爆主動問上司可唔可以延長試用期，結果被拒絕……我有少少開心，係咪我太黑心？
初初聽到上司話：「小妹妹鬧下情緒啫。」我確實係幾失望，鬧情緒唔係大晒，我哋其他人無辜㗎，點解個上司咁懦弱唔take action或者鬧Judy幾句呀？
Judy最癲嗰段時間冇即刻叫佢走，反而後來成個月正常返，但就喺試用期屆滿前先唔要Judy，連Chris都話有啲意外。
就算係fresh grad，點計都已經係成年人啦，即使未夠成熟都唔應該要其他人受埋你嘅壞情緒，你有唔開心，其他人一樣有唔開心，同埋做做下嘢走咗去係影響埋同事，你而家笑返啫，下次再嗌交又點呢？大家要再受多一次？出嚟做嘢情緒管理好重要，無論咩年齡同埋咩身份都係一樣，希望Judy經過今次之後會成熟啲啦！（完）
其實壞情緒同埋臭脾氣真係好影響同事，其他人係無辜㗎！
唔好畀脾氣大過能力 美術同事辭職想返轉頭
https://hkofficedaily.com/?p=11516
同事結怨形同陌路以為佢兩個血海深仇
https://hkofficedaily.com/?p=19508