入嚟呢間公司雖然未夠三個月，不過我已經留意到一個奇特現象，就係有兩個同事彼此互不理睬，唔會打招呼，唔會傾計，唔會有眼神接觸，而佢哋係同一個department㗎，坐嘅位置亦只係一前一後。
返工頭一兩日我仲未發現嘅，當時自己都係新人，點理得咁多吖，慢慢地我留意到Icy同Nicole好似好生疏，例如Icy講緊一樣嘢，我哋全team熱烈討論，Nicole就會唔出聲唔參與；輪到Nicole分享一啲搞笑嘢，我哋個個都笑到肚痛，Icy又一個人好冷靜唔笑唔望冇反應。
返多幾日工之後更加肯定自己嘅感覺冇錯，因為每逢食飯都唔會齊人，包括我餐welcome lunch，總之永遠出去食嘢唔係冇Icy就係冇Nicole，佢兩個例牌唔會同場出現，咁我覺得奇怪就問另一位同事啦，點知佢好似好慌張咁同我講：「係呀，Icy同Nicole唔啱㗎，你下次唔好再喺佢地面前問點解唔齊人呀，我都怕咗佢哋發癲。」
講到好似辦公室古老禁忌咁，真係好想知佢兩個發生咩事。
呢幢商廈嘅廁所係全層共用，我哋去toilet要行出公司經過一條走廊，條路容納到兩個人平排㗎啫，有次我喺後面見到Icy同Nicole迎面喺走廊相遇，佢兩個竟然當對方透明，講真平時見到隔籬Office唔識嘅人或者大廈清潔嬸嬸都會點下頭啦，Icy同Nicole同部門坐前後喎！
有次我唔識點處理一件公事，其他人又行開咗，得返Nicole坐喺度，咁我就問佢啦，其實Nicole平時好肯答嘢，不過佢見到份文件有Icy簽名，即刻落晒閘話唔識唔知，叫我唔好問佢，態度180度轉變，真係有啲嚇親我。
又試過同Icy一齊去Pantry斟水，行入去之前見到Nicole沖緊咖啡，Icy本身同我講緊笑都突然停咗，U-turn返埋自己個位，等到我同Nicole搞掂，Icy先至再拎起隻杯行去pantry，我意識到佢兩個應該有好大仇口。
直至早兩個禮拜，有個女同事結婚請食飯，其實因為疫情關係，佢嘅婚禮已經兩度改期，連Honeymoon都無限期押後，所以佢唔係派帖，係純粹同老公請我哋圍內食餐飯，原來佢老公以前都喺呢間公司做嘢，所以同公司唔少人都有交情，不過傾到Icy同Nicole嘅問題嗰陣，呢位新婚女同事就開始皺眉，事關請Icy就冇Nicole，請Nicole又冇Icy，唔想得失其中一個，又唔想食兩次飯。
新婚女同事：「我老公話唔使理，兩個叫晒，佢哋唔嚟都冇辦法喎，咁又係既，唔通我哋結婚請食飯仲要兼幫Nicole同Icy做心理輔導咩！」
另一位同事：「不如咁啦，兩個都唔好請，咁你就唔會得失任何一個，我哋私底下食，飛起Icy同Nicloe囉！」
阿姐：「梗係唔好啦，結婚請食飯仲要顧佢哋感受？總之你兩個都叫，出唔出席就佢哋自己諗啦，做咩要庸人自擾啫！」
呢個moment我終於忍唔住喇！
我：「唔好意思各位，可能唔應該咁八卦，但我真係好想知道Nicole同Icy究竟有咩牙齒印，我見佢哋迎面相遇都可以互當透明，以前發生咗乜嘢事呢？工作上跣過對方一鑊？搶功勞？爭升職？定係鍾意咗同一個男同事？」
阿姐：「邊有咁誇張呀？有一次Icy傾私人電話行咗出去，好似係同男朋友鬧交，然後差唔多lunch time，Nicole叫外賣冇預佢。」
我：「就係咁？」
另一位同事：「嗰次氣氛好僵，Icy傾完電話返嚟發晒脾氣話叫飯唔預佢，Nicole就話以為Icy約咗人，嘈多兩嘈連外賣都嚟埋，Icy粒聲唔出自己衝咗出去，Nicole臨尾好大聲話失戀唔好搵人出氣，從此之後，我就冇見過佢哋講嘢喇。」
我：「What？？？？？咁小事？」
阿姐話私底下分別同佢哋傾過，但兩個都話自己冇錯，兩個都話唔會主動同對方傾計，所以冇咩實質嘢做到，唔通連社工嗰份都撈埋咩，雖然氣氛係尷尬啲，不過唔影響到正常工作就理唔到太多喇。
痴線！以為咩事血海深仇，原來係芝麻綠豆，我仲知道Icy同Nicole足足一年互不理睬，其實嬲一個人都好攰㗎，仲要嬲咁耐，不過同事都講得啱，唔關事就無謂介入，解鈴還需繫鈴人，自己啲嘢都未顧掂，無謂理人啦，但為咗叫外賣問漏一句就搞到變成世仇，真係好小學雞呀！