件事有少少複雜，首先係我哋公司要請人，不過請咗好耐都冇一個見得啱，結果就要搵headhunt幫手，對方send咗幾份resume過嚟，其中一位求職者無論各方面都好fit，而且expected salary都適合，咁就即刻叫headhunter約佢上嚟見工啦！
嗰日朝早個求職者上到嚟，receptionist已經用內線同我講：「喂，有個candidate話約咗interview，不過佢長頭髮好rock㗎喎，Hilda姐真係ok咩？」Hilda姐就係今次請呢個position嘅department head，份人都幾拘謹同埋腌臢，否則都唔使搵到headhunt啦！
雖然我知道個求職者係男仔，不過長頭髮嘅定義人人唔同，鄭伊健喺我心目中都算係長頭髮，如果好似「伊麵」咁我又唔介意呀！隔住內線講多無謂，一陣interview直接見下仲實際，如是者我就叫receptionist唔好理咁多，快啲畀張form個男仔入房填。
程序上係我見完覺得ok先嗌Hilda姐in多round嘅，但係呢個position實在拖得太耐喇，Hilda姐自己都心急，加埋當日佢有個會要開，所以就同我一齊入去做interview，打算慳返啲時間。
入到房果然係一位長頭髮嘅男仔，但係比鄭伊健長好多，起碼去到心口，冇紮起，我唔否認我有啲年紀，你知唔知以前香港有隊組合叫Blue Jeans？即係而家嘅豹哥單立文，仲有黃良昇同蘇德華嘅3人組合，佢哋當年就係長頭髮，而呢位求職者正正係咁上下feel，簡單啲可以google search「黃良昇Blue Jeans」。
個人感覺Hilda姐入房嗰刻係向後退咗半步，唔知真係以為佢想唔in就調頭出返去，咁人哋又嚟咗，你同我又行咗入去，in啦！諗咁多做咩吖！
Hilda姐一開始已經衰聲衰氣，不過佢又吹個求職者唔漲，因為無論問乜都好，個男仔都一定答到，仲要答得好好，而我之前幫呢個position見咁多個candidate，夠膽講眼前呢位長髮男仔係表現最好嘅一個，無論係應對方面嘅淡定程度，抑或係工作需要嘅知識層面同經驗，呢位求職者都係超班。
初時見到人長頭髮而in得不情不願嘅Hilda姐後來亦軟化，成個interview歷時1小時15分鐘，以Hilda姐嘅標準嚟講算in得耐，過往其他candidate無論佢覺得啱唔啱都好，絕對唔會見超過20至30分鐘㗎！
In完，長髮男走埋之後，Hilda姐第一句係鬧我：「點解你唔同我講個求職者係長頭髮呀？我唔鍾意囉！」
我：「今日我都係第一次見佢咋，個headhunter都冇同我講。」
Hilda姐：「咁點解個Headhunter唔講聲呀，頭髮長到去心口，應該算特別情況啩，個Headhunter唔係應該講一聲咩？至少問下我哋介唔介意請個男仔咁長頭髮，甚至係要畀定啲心理準備我哋。」
你問得好好呀Hilda姐，首先我唔會因為對方長頭髮就唔見，至少我會照in然後提早單聲畀Hilda姐知道，不過呢種情況嚟講，Headhunter係應該先畀個提示我。
第一時間打畀個headhunter，佢自己都嚇一跳，仲表示喺事前並唔知道。
我：「你點樣唔知道呀？個candidate係你介紹畀我㗎喎，你自己冇見過㗎？」
Headhunter：「我冇見過佢真人呀，淨係電話傾咗幾句，佢啲CV同resume全部冇相，sorry呀……」
我唔知你哋點睇，亦唔係因為我畀Hilda姐鬧先至賴埋個headhunter，但係headhunt公司作為「服務供應商」，你介紹個人嚟我公司interview，係咪最低限度要由headhunt公司見一見先呢，就咁樣將份resume左手交右手，連candidate咩樣都未見過就嗌人去interview，個人認為個headhunt好唔專業。
不過當時已經唔係追究責任嘅時候喇，同一時間Hilda再畀咗另一個難題我，就係叫我嗌嗰位求職者剪頭髮……
Hilda姐：「如果唔計個樣呢……我唔係話佢五官，我係指佢啲頭髮。」
我：「明白，你繼續講埋落去先。」
Hilda姐：「如果唔計外型，我一定會請佢，不過我哋請Business Development喎，我想像唔到佢點見客，總之你同佢講，如果肯剪短即刻請！」
點解我話個headhunter唔夠專業呢？因為我哋請Business Development，都係Sales啦，呢個position要見client，雖然有啲儀表嘅要求唔會咁老土講出口，但某程度上應該係有共識。
Headhunter唔專業係一回事，我就好尊重合約精神，理論上我哋公司唔可以直接contact個求職者，所以我就將Hilda姐嘅反應同要求轉達畀Headhunter聽，為免佢又有唔專業嘅表現，我直頭教埋佢點講。
我：「雖然最初冇講明Business Development唔可以留長頭髮，但你都知香港一般公司都比較保守同傳統，呢方面我認，我唔想個candidate有hard feeling或者覺得唔受尊重，你問下佢會唔會考慮剪頭髮吖，個line manager好注意形象，幫我向個candidate講聲唔好意思。」
我唔賣咁多關子喇，同headhunter陳述咗件事，再千叮萬囑佢要同個candidate講唔好意思之後，過咗唔夠15分鐘我已經得到回覆……
Headhunter：「佢唔肯剪呀，聽完之後好反感，話唔會考慮你間公司，不如咁吖，我手上仲有幾份resume都幾適合，而家send埋畀你睇先吖！」
唉！咁好嘅一個candidate，Hilda姐又唔肯讓步，我已經費盡唇舌，話頭髮長短根本唔重要，作為一個Business Development最重要係有嘢返同埋幫到公司啫，但Hilda姐都唔聽我講。
嗰位長頭髮求職者當日interview嘅表現太出色，以致Hilda姐之後再見咗幾個candidate都覺得唔ok，呢啲真係冇比較冇傷害，Hilda姐今日又同我提起長頭髮求職者，佢叫我再搵個headhunter商量下，睇下可唔可以說服到人哋剪短頭髮喎！都話咗唔得啦……睇怕呢個position應該有排玩，唔知復活節過後請到人未呢？慘！（完）
睇咗「日本Lawson便利店員訪問」未呀？受訪者會分享日常工作見過咩西客，又大談Lawson嘅人工待遇，未睇嘅朋友可以click以下連結，順手CLS同撳埋個鐘仔，下次有新片就會第一時間收到通知㗎喇！
https://youtu.be/iJSMioFS2KM