Speed Dating最憎遇到嘅客─情侶座

其實我麻麻地去handle多人嘅speed dating,我比較鍾意handle一對一嘅job,唔係因為一對一收得貴啲,而係嗰啲10男10女、14男14女,或者再多人啲嘅event,根本冇時間去scan啲客,好多時都係電話或者WhatsApp報名,入完錢之後,當日照時間地點喺餐廳或者酒吧直接見,門檻較低就自然咩人都有。

多人event嘅玩法舉例係12男12女,女仔通常就坐定定喺一個位,然後男仔就順住入場時拎嘅number一直移動,總之每移動一次,每pair會員都有5至10分鐘時間互相傾計,我最撚憎係遇到啲sell嘢嘅人嚟搵食,作為職員嘅我有責任睇住個場,有時如果個別會員甩底冇嚟,又或者當日唔爆滿,男女比例就會唔對稱,例如出現11男12女,咁就永遠會有個女士要對住空氣幾分鐘。

我知道坊間好多speed dating公司係唔理既,由個女仔齋坐,不過我覺得有啲尷尬同無癮,如果我監場就一定坐落去陪對方傾下計。

有次我坐咗去個吉位,同對面個女仔客傾計捱時間,竟然聽到隔離另一枱,有個男仔喺度sell緊對面個女仔買保險,仆你個街咁即係搞臭我公司個朵啫!一陣啲客以為我哋同保險公司夾埋sell嘢咁點呀?所以我就出聲制止,條友仲要勁厚面皮笑笑口話:「唔好意思,職業病。」人哋畀錢嚟想識朋友㗎,唔係嚟聽你sell保險呀大哥!

我同事都有遇過呢種情況,不過佢嗰次係遇到MK妹保險經紀,同事又係出聲制止話唔可以sell嘢,條MK妹真係壞過婷婷,串嘴反駁:「吓,我畀300幾蚊嚟,真係想識仔呀?諗住拎電話做生意咋,當識10個人,即係平均30蚊拎一個電話number,有咩問題呀?」

勁討厭呀!搵食行遠啲啦!

仲有一種人又係好冇品,頭先咪講過多人event男女數目一般balance嘅,然後就每pair會員各自傾計幾分鐘,再不斷移動落去,咁有啲人可能見到下張枱嗰個異性唔係自己杯茶,跟手走去廁所去足5至10分鐘,擺到明係要避咗佢,到再下一round移動時,佢就會走返出嚟,我覺得有少少唔係好尊重對方,如果真係冇興趣,咪傾閒計囉,或者唔使計到咁準走咗去,又計到咁準時返嚟開始下一round,留返一分鐘坐低say個hi都得啩,基本禮貌啫!你避得咁明顯,對方on99對住空凳坐幾分鐘好難堪㗎!

不過咁,一對一嘅場合我都遇過一單勁過份,呢種一對一event本身我唔使留低,同男女雙方打聲招呼就走得,但係嗰次真係走唔到,個女仔仲要扯火離場,聽日再講。

error: