早排見你出post講啲老細迫員工食飯飲嘢BBQ，個個嗌晒救命叫苦連天，唔係話你哋唔慘，但如果真係要鬥折墮，不如聽下我嘅經歷先啦，到時再鬥慘都未遲。
我老細係肥佬一個，典型地中海大肚腩，不過佢又好鍾意踢波，鍾意到點樣呢？買晒成set波衫同班員工組隊，因為我哋公司算多人，就算約唔到對手，自己友踢波都可以湊到7個人vs 7個人（呢度都有14個男同事），有時唔夠人，老細又會搵佢自己啲阿叔friend出嚟一齊踢。
有人提供埋波衫同場地，可以踢波出身汗本來唔算壞事，但係老細係超級屎波，佢個肚腩都成斤重，跑又跑唔郁，咁都算喇，你落場仲要畀面佢，試過有次通佢坑渠過波，半場即刻畀我個上司「照肺」，好L記得上司咁樣同我講：「喂你畀下面老細吖，做咩通佢大細呀？」
「佢對腳擘到咁大咪通囉，人都捐到過去啦！」
「你唔好羞辱佢吖嘛，扭過咪算囉！」
「通你坑渠即係羞辱你？咁即係黃子華嗰句：向你解釋就叫鄙視你，問你攞tips咪即係打劫你？」
「仲有呀，你哋醒目啲啦，下下搶走老細個波，咁樣佢咪好冇癮囉，識唔識做人㗎！」
明白！我哋決定踢老細對面嗰隊就唔好扭波，老細跑就唔追，老細射波我哋就唔攔截。
咁如果同老細同一隊呢？咁就對住空門都唔好射，將個波交比佢，由佢親自射入，咁得啦啩！
點知都仲有唔滿意……
「老細同我提過你哋踢得好hea，拍埋去吖嘛，佢話你哋好似讓佢咁，踢得唔過癮，加多兩錢肉緊吖！」
好難做喎！已經打假波啦，仲要交埋戲？
所以我越嚟越唔鍾意join公司踢波，因為除咗要討好老細之外，同一時間仲有其他「戰爭」上演緊，其中一條team嘅Manager同埋Assistant Manager（以下簡稱AM）不嬲都唔啱，同一個部門但口和心不和，基本上個個都知㗎喇，因為佢兩個平時喺office講嘢已經有骨，有傳係Manager經常邀功，搶晒啲嘢返嚟但自己永遠唔會落手落腳，咩都交晒畀個AM，做完又走返出嚟領功。
唔知佢兩個之間仲有咩私人恩怨，但嗰位Manager出晒名冇品，成日對住女同事講黃色笑話，講完鹹濕嘢又扮講笑嗰種呢，係幾乞人憎㗎！
唔知有心定無意，有次鬥波個AM鏟到呢位Manager飛起，我喺場邊都睇到呆咗，你知踢衛生波冇人著護脛㗎啦，當時要搞到call白車好大件事，後來個Manager唞咗3個月先返工，仲要棟住拐杖復工，唔知佢哋而家係點相處呢，我都唔敢諗，肯定好尷尬。
總之同老細踢波真係慘過做鴨，又要放水，又要交戲，又要睇住其他同事之間嘅恩恩怨怨，仲有幾個唔識踢波嘅擦鞋仔死都要跟埋嚟，未過半場就係咁叫人射，射你老味咩，射精呀？啱啱過中圈咋！
諗諗下都要搵次扮受傷先得，唔想再同呢班騎呢怪踢波，所以你哋話老細叫員工飲嘢食飯好慘？試下跟我去踢一次波吖，咁你就會明乜嘢係慘過做鴨。