當雙面擦鞋精 遇上回流老闆仔

我哋公司有個辦房,主要畀同事拎sample出去見客,又或者product development會攞嚟做reference,新人同trainee都會入去,因為開始嘅時候要了解公司產品。

而呢個辦房係有個阿姐坐喺度,正常嚟講呢個職位係需要嘅,你可以想像佢係一個圖書館管理員,你搵唔到嘅嘢,或者想搵嘅嘢可以問佢,走嚟還sample亦可以擺低畀呢個阿姐整理,不過嚴格而言,佢嘅職位亦都係唔需要同埋可有可無。

點解咁講?因為呢個辦房阿姐勁寸,而且見高拜見低踩,係一個雙面擦鞋精,舉個例,如果落嚟攞辦嘅係經理級人馬,辦房阿姐會烚熟狗頭咁款,我做咗5年,睇住佢同幾個manager係咁講嘢:「哎呀,你唔使特登走落嚟㗎,打內線叫我執辦咪得囉!咁靚仔嘅今日,一睇你件西裝就知係貴嘢啦!」

而對住一般同事,辦房阿姐就會即刻變臉:「你咪摷亂晒啲嘢啦!你同我記實啲位呀,還嘅時候自己擺返,唔好要我同你執!」

我曾經見過幾個trainee畀佢鬧到喊,人哋啱啱入嚟做乜都唔識,打招呼佢又唔應,問佢嘢又鬧你,唔問又畀佢屌,有新人仲講過,喺呢間公司最大嘅壓力唔係日常工作,而係要落辦房執sample,你話幾誇張。

我做咗咁多年仲要畀佢鬧,其他同事亦好憎佢,落親去都見到呢個辦房阿姐用手提電話煲大陸劇,行入去已經睥緊你,好似土皇帝咁惡。

點解唔炒或者鬧返佢轉頭?有同事試過同辦房阿姐口角㗎喇,不過好佬怕爛佬,爛佬怕潑婦,正常你唔會想同佢嘈,加上佢係會計部女經理介紹入嚟做,雖然未稱得上係皇親國戚,但總算有人照,所以態度咪咁差囉!重點係辦房阿姐係雙面人,我向阿頭反映過,但佢唔覺,梗係啦,辦房阿姐揀人嚟恰,對唔同人係唔同面口㗎!

後來出現咗個轉捩點,我事前都意想不到,話說老闆個細仔喺日本回流返香港,已經賦閑在家一段時間,見悶悶地就打算返公司學下嘢,方便將來子承父業。

老闆無意隱瞞其他員工,只係未嚟得切宣布,不過我哋sales team係第一個知,因為老闆安排咗一次lunch,而我阿頭係老闆頭號愛將,冇計啦,sales主宰公司生意成敗,我阿頭盤數不嬲靚,受重視好正常。

初次喺餐廳見老闆仔,冇乜特別,後生仔一個,但有啲少爺仔脾氣同埋腌尖腥悶,喺餐廳已經不斷詐型。

老闆仔:「香港啲service唔得囉!頭先個侍應黑口黑面,日本唔會咁㗎!」

老闆:「咁你都識講啦,呢度係香港吖嘛,文化唔同,冇得咁比。」

老闆仔:「文化唔同都要敬業㗎!我喺日本食飯啲人鞠晒躬,笑容好好。」

老闆:「表面鞠晒躬啫,背後咪又會鬧你。」

老闆仔:「背後鬧還背後鬧,喺個客面前都要有禮貌㗎,好基本㗎喎,最憎人冇禮貌!」

可能見佢兩仔爺為小事你一言我一語,我阿頭嘗試打圓場:「係呢,有冇想入嚟公司做邊條team?去我哋sales department吖,可以學下見客。」

老闆仔:「咪搞,最憎求人。」

老闆:「咁你想做邊個部門吖?」

老闆仔:「諗諗先啦,一陣食完lunch上公司睇下。」

我:「都好呀,介紹其他同事你識,反正佢哋都未見過你。」

阿頭吩咐我食完lunch帶老闆仔喺office同其他同事打招呼,順便周圍行下參觀下,本身風平浪靜,個個知道係太子爺都肅然起敬,但係一落到辦房就出事喇,我未嚟得切開口介紹,辦房阿姐就貫徹始作風先聲奪人。

辦房阿姐對住我講:「又有新人返工呀?唔該你同人講清楚啲嘢點擺,唔好個個落嚟整到亂晒,我唔會同你哋執手尾㗎!」

老闆仔呆一呆,望咗我一眼,正當我不知所措之際,老闆仔伸隻手去櫃度拎起件sample,辦房阿姐即刻發癲:「喂你唔好亂搞啦!我呢度唔係學校呀!要學睇辦就執上去慢慢睇,麻煩你哋!保你哋大!」

正常發揮吖,之前啲Trainee都係受到相同對待,嗱!我冇跣辦房阿姐㗎!佢自己躁底唔關我事!

老闆仔好惡咁望住辦房阿姐:「你都幾冇禮貌。」係呀係呀,呢個老闆仔好注重禮貌,佢太受日本文化影響,頭先食一餐飯已經講咗好多次關於禮貌嘅問題。

辦房阿姐:「對住你啲新人洗咩講禮貌呀,你過到試用期先啦!」辦房阿姐好勇。

老闆仔黑晒面離開,我都唔得閒解釋,直接跟住佢走,再睇住佢直入老豆間房,Oh No!我好似個小太監咁陪住太子向皇上告狀,開頭老闆叫將就下,因為辦房阿姐做咗好耐,又係會計部女經理介紹入嚟,但係老闆仔話要入嚟公司做,一定唔容許有呢種冇禮貌嘅員工存在,正所謂左手又係肉,手背又係肉,而親生仔始終係自己骨肉,唔通老闆會保住個辦房阿姐咩!

最後點?咪炒咗個辦房阿姐囉!全公司當老闆仔係偶像,而最經典係老闆仔返咗工兩個月之後就冇做,聽講話自己同出面啲friend搞生意喎,真係來也匆匆,去也匆匆,不過佢今次都算幫同事除咗大害,好多人都話而家辦房全自助式仲好,入去拎sample冇晒壓力,唔使無端端畀人鬧都唔知咩事,老闆仔萬歲!

error: