一直以為嗰啲倫敦金公司係座落港島區，冇諗過喺長沙灣都會遇到，仲要喺我返工嗰棟大廈，其實最初冇特別留意，但有次同同事傾開，我話搭lift成日見到啲著西裝嘅MK大大聲講粗口，鬼五馬六著起龍袍都唔似太子，後來同事話我知7樓有間倫敦金公司。
我成日見到嗰班MK平均年齡比較細，偶爾會有一兩個中坑喺裡面，不過無論咩年齡層都好，佢哋個Look都係勁似古惑仔，甚至可以話係賊眉賊眼，著住西裝都唔似斯文人，有幾個睇黑眼圈都幾乎肯定有食白粉，骨瘦如柴靈魂漂浮，真係十級騎哩。
有MK仔當然亦有MK妹，佢哋嘅衣著簡直係不得了，低胸露背乜都有，有啲條裙短到見到底褲咁滯，不過呢班MK妹啲樣又睇得下，應該係用嚟set天仙局釣咸濕佬，有時同佢哋同lift，你會以為自己唔知上緊咩大廈去雞竇。
佢哋大部分時間都係聯群結黨，企正喺大廈門口或側邊圍埋煲煙，講嘢又大聲，就算喺電梯𥚃面咁狹窄嘅範圍都唔會收細聲浪，我曾經親眼見住一個速遞阿叔睥住佢哋，然後班西裝MK就兇返人轉頭，出咗電梯之後狂踢度lift門，嗰次真係畀佢哋嚇死，有少少似置身屋邨遇到童黨。我公司雖然喺長沙灣咋，但呢棟大廈係好新，唔係嗰種舊式工廈，其實倫敦金公司揀得呢度，門面都唔會差啦！
聽講同一棟大廈有幾間公司都向管理處投訴過，但係一樣冇佢哋符，而且啲投訴往往不了了之，又冇跟進，有傳倫敦金嗰層樓嘅業主都想收返個單位，不過一直只聞樓梯聲，遲遲未見任何行動同改善。
有同事話見過呢班MK喺樓下打交，但究竟係自己人打自己人，抑或係呃完錢畀仇家打就真係唔知喇，因為冇方法證實，總之呢間嘢就神憎鬼厭，好唔想見到佢哋！
天有眼，最期待嘅畫面終於喺上個月出現，因為有警察走嚟拉人封office，當時其實都係估估下，淨係知樓下好嘈，好多人擾攘，我落街買飯嗰陣見到好多人抬電腦上車，隔咗幾日search返新聞，原來係咩商業罪案調查科搗破倫敦金騙案，睇內容先知道嗰間公司除咗呃人上去開戶口之外，仲成日搞埋啲投資倫敦金講座，唔怪得平時咁多閒雜人啦！
倫敦金由細聽到大，封完舖又開，開完又封，封完再開過，講到尾都係香港冇完善法例監管，嗰班老千先至會不斷死灰復燃，唯有希望佢哋唔好再開喺我做嘢嘅地方啦，你試過同倫敦金啲MK同一棟大廈，甚至係同一層樓返工，自然會明白有幾討厭㗎喇！
投稿讀者：Winnie
=====
😅 一講倫敦金，好自然又會諗起傳銷……
【每人身邊梗有個做傳銷嘅親戚朋友】Vol. 1
https://hkofficedaily.com/?p=17452
【每人身邊梗有個做傳銷嘅親戚朋友】Vol. 2
https://hkofficedaily.com/?p=17455