朋友share咗個post去群組，內容係講有HR收到份CV，咩資料都齊，係冇電話號碼，負責人當時企咗喺度，因為唔知應該回信定係做家訪。
朋友：「你哋幾個都做過HR，有冇收過咩奇怪CV？冇電話號碼咁大頭蝦都得？」
我：「可能candidate唔小心漏咗啫，何況收到份CV，意味住你都會有candidate嘅email address啦，咁又使乜回信或者家訪呀？除非佢本身都係叫人郵寄CV去公司啫，有時搵工真係會搵到頭暈，互相體諒下囉！」
另一個做HR嘅friend又搭嘴：「雖然漏打電話號碼係粗心大意，但我都有收過幾份CV係咁，呢啲算小事㗎喇，試過收到份全部都係怪獸字，我估佢convert file時出錯。」
我：「不過我有次好嬲，當時收到CV，download完就double click開大嚟睇啦，一彈出嚟係A4 size嘅黑白相，我坐喺位都震一震。」
朋友：「個candidate係咪好靚女所以咁有自信？」
我：「嗰個阿叔嚟㗎！」
大家講到興高采烈嘅時候，其實呢個群組仲有一個資深HR，佢淡淡然講咗句：「你哋係咁多？呢啲通通碎料，全部行埋一邊啦！」
我：「唔通你收過體毛嗰味嘢？」
資深HR：「我收過花，係好大紮花。」
隔住個電話，我唔肯定group裡面幾個朋友有冇笑，我就真係忍唔住，因為呢位資深HR係男人，法國球王施丹咁嘅髮型（其實施丹應該係冇髮型），加一個好似有咗6個月身孕嘅肚腩，除咗佢老婆之外，應該唔會有人識得欣賞。
其實呢位資深HR喺某娛樂公司做，就算冇出招聘廣告嘅日子，都會有人send CV嚟自薦，當中好多都係藝人嘅fans，想入去做然後近距離接觸偶像。
佢自言唔同風格嘅自薦信都收過晒，但收花真係有今生無來世，紮花係連埋封信，個信封寫住：「To HR manager」裏面有CV同Resume之外，仲有一張用中文撰寫嘅千字文，大致係講自己係某某藝人fans，所以好想入嚟工作，仲有一句好震撼嘅remark ——— 頭一個月可以唔收人工！
我：「咁你有冇俾個機會人哋上嚟見工？」
資深HR：「我叫佢上嚟攞返紮花走，對方係個20出頭嘅小妹妹，佢見到我係一個大肥佬都嚇親，仲話以為得女人會做HR……」
我：「最後有冇請佢吖？」
資深HR：「冇，咩叫頭一個月可以唔收人工？你咁樣係做壞規矩，就算幾想入嚟做，幾想親近個星，都唔應該做義工，最唔鍾意人頂爛市，更何況……呢單嘢我畀同事笑到今時今日仲笑緊。」
終於明白點解冇留電話、全部怪獸字、A4大頭黑白相對佢嚟講通通係碎料，大佬呀！CV連埋紮花喎，其實計創意係冇得頂㗎，起碼個HR一定會拆你封信先，可惜吖，送錯咗畀個肥佬🤣
=====
🕺🏻 Happy Friday繼續睇開心嘢，仲記唔記得呢個兩年前嘅post？叔叔份工而家好好，仲未有機會做保安。
《其實世界咁大，走遠啲又有咩所謂》
https://hkofficedaily.com/?p=4488