【每人身邊梗有個做傳銷嘅親戚朋友】Vol. 2 – 叫埋阿爸阿媽上洗腦堂
我同事最終都冇跟到佢前女友去上嗰啲精神領袖課程, 一來佢個ex本身係好現實嘅人, 呢類人突然間過度表現關懷, 係好容易令人提高戒心, 二來我哋身邊已經有人中過伏, 大家一講起呢啲傳銷洗腦課程, 已經心中有數, 但問題係呢個始終係佢嘅ex, 佢都唔想睇住一個曾經好熟嘅人死, 所以我同事將網上搵到嘅資料sent俾個ex睇, 希望點醒佢, 結果梗係嘥氣啦。
本來我同事打算應約上一堂, 順便踢館搞事, 但咁做搏唔過, 事關呢個洗腦課程嘅上堂地點喺深圳福田, 玩下手有咩事真係俾人溶左都有份, 我唔知究竟係策略上要啲人返大陸上堂冇得走吖, 抑或係中港兩地嘅騙徒聯手設局, 如果有網友知道佢哋係點玩法, 不妨講聲我知, 如是者, 我同事冇冒險上堂, 只能祝佢個ex好運。
大約過咗一個月, 以為告一段落啦, 點知未完, 佢個ex又搵佢, 今次問佢借10幾萬, 理由係佢要投資啲唔知咩生意, 有deadline要趕住投放資金, 而佢個ex喺幾年前辭咗份正職之後, 就係靠喺網上賣韓國女裝維生, 所以大條道理話啲錢用咗嚟入貨, 冇現金先要問佢借。
由於10幾萬呢個數目真係太大, 我同事出於擔心, 驚背後唔知有咩事會一發不可收拾, 結果忍唔住私下whatsapp個ex嘅阿哥, 因為佢哋拍拖嗰陣, 我同事同佢屋企人關係都好好, 然後佢阿哥就將件事和盤托出, 原來佢個ex已經叫埋阿爸阿媽俾錢去上堂, 一個人大嗱嗱兩萬幾蚊學費, 講緊一個階段咋喎, 而佢個ex嘅兩老都已經60幾歲, 仲上乜鬼嘢精神領袖course呀請問? 佢阿哥話見到阿爸阿媽日日上深圳福田上堂, 朝早上到夜晚, 返到香港屋企都凌晨, 個心好痛, 勸又勸唔聽, 因為兩老錫個女, 想俾支持佢, 咁都不特止, 佢個ex仲叫兩個老人家投資啲咩骨灰龕場, 上網search過已經見到有報道話係騙局, 政府唔會發牌, 一個骨灰龕位要投資20幾萬, 咁都要掟錢落去? 嗰啲係老人家嘅棺材本嚟架, 另外仲有投資啲咩還原水, 幾廿樣生意, 好似創業係食菜咁易, 猛咁叫身邊人投資, 佢就日日喺facebook出post #感恩#充滿力量 等等繼續自high。
其實呢啲層壓式推銷, 最痛苦係sell你嗰位係熟人, 甚至親人, 佢哋有啲係純粹呃你錢, 有啲就係真心信咗, 自己做幫兇呃緊人都唔知, 因為佢本人真係迷咗落去, 呢下先至最心痛, 有好多新聞都講過, 呢啲人第日醒覺返之後, 已經患有抑鬱或者輕微精神病, 就算乜事都冇, 亦唔知點面對呢段過去, 作為佢朋友或親人, 你鬧佢又唔係, 幫佢又好似無底深潭, 洗腦式傳銷真係害人不淺。
#預咗有啲賣還原水嘅傳銷L嚟踩場#精神領袖課程#傳銷洗腦#骨灰龕場騙局