早排全公司同事都收到風要裁員，消息話每個department最少交一個人出嚟，至於裁邊個就由dept head決定。
其實嗰幾日已經feel到office氣氛好凝重同埋緊張，有幾條team甚至叫齊人入房開會，再隔多兩日，連我條team都唔例外，dept head開場白都冇，坐低就直接同我哋講：「大家應該收到風啦，不如你哋傾下，有冇人自己想走？」
如果由dept head揀人就冇嘢好講，但要由同事之間自己做決定真係唔識畀反應，結果亦冇人主動話走，最估唔到係有個同事望住我話：「Hubert你會唔會考慮走？」
我：「吓？」唔係話賴死唔走，但係由同事點名問我會唔會走，個感覺好奇怪。
然後另一位同事和應：「係啦Hubert，唔係想迫你呀，唔好誤會，不過呢度年資最淺係你。」
我條team有5位同事，佢哋咩背景都有，當中有兩男兩女未結婚，廿幾歲，有個男嘅就結咗婚，30幾歲，冇小朋友，我自己就single，28歲。雖然我嚟得半年，係佢哋班人裡面做得最短時間嗰個，但年齡並唔係最細，亦唔係最老，更加唔係fresh grad，只係遲入職，冇佢哋幾個私底下咁friend啫。
Dept head：「你哋唔使而家決定，仲有時間討論，下星期再傾，我都要諗諗先。」
同事嘅反應令我好失望，再重申一次，我唔係賴死唔走，係唔明點解要畀平起平坐嘅同事決定我命運。
之後連續幾日，班同事都有意無意咁畀說話我聽，節錄最誇張嗰幾句：
「其實呢間公司都唔係咁好啫，我係Hubert就出去搵過份，年中搵工未算好難。」
（公司唔好你又想留低？年中搵工唔難你又唔出去搵？）
「如果我畀人裁，阿爸阿媽實會發癲，肯定日日畀說話我聽，Hubert你阿媽平時會唔會煩你？」
（得你有老豆老母生咩，我冇家人㗎？）
「Hubert你屯門返港島區係咪好遠？如果我住屯門，一定唔會揀份工要過海。」
（屯門人只配喺屯門返工係咪？）
唯一結咗婚嗰位同事就冇乜出聲，反而佢開聲我冇咁難受，始終佢有家庭。我明白自己入嚟只有半年，冇佢哋幾個咁好感情，但係三句唔埋兩句喺度焗我走，個心真係好難受，亦體驗到職場嘅醜陋。
雖然唔忿氣，但我都主動搵咗dept head話走，dept head算交足戲，雖然佢冇立場想邊個走，不過都叫做安慰下我，又話將來有咩需要幫手可以搵佢，是但啦！我自己舉手係因為對班同事好失望，唔阻你哋自己友圍爐。
同事好快收到消息，走埋嚟問我點解主動辭職，好心你哋唔好咁假啦！想嘔呀！又話要同我食飯farewell，慳啲啦！意料之外嘅係，只係隔咗一日，dept head又叫我哋入房開會，然後對住我講：「Hubert你唔使走，要搵過另外一位人選，想問下其他同事有冇決定？有冇邊個自願走？」
所有人都覺得好驚訝，包括我。
我：「點解？」
Dept head：「因為你份糧唔夠數，老細唔係計人頭，係計條大數，佢想每個部門慳一嚿錢，你份糧未夠，如果係你走，我哋仲要走多一個先得。」
我聽完個心更加沉，原來我係全team人工最低嗰個，應該同其他人仲有啲距離添，肯定唔止差一千幾百，否則老細唔會咁拘泥話未夠數。
我：「唔好意思，夠唔夠數都好，我都要走。」
Dept head：「呢個唔係鬥氣嘅時候。」
我：「唔係鬥氣，我過兩日有interview，搵返屯門呀，返工方便好多唔使過海。」（其實我吹水，但真心想畀說話其他人聽）
Dept head：「你走冇用㗎，你走咗，我都係要減多一個人，即係條team少兩個，而家公司玩自然流失，少兩個人就唔會請返㗎喇，你走埋只會做死佢吔。」
本身都冇咁堅定，Dept head講完呢句「公司玩自然流失，少兩個人就唔會請返，到時做死佢哋」之後，我更加決意要走，係呀，就係想咁之嘛！
Dept head開會後叫我留低私下討論，我都唔兜圈喇，直接話對班同事好失望，之前日日有說話聽，唔想再留喺度做，dept head冇我符，講咗幾次叫我唔好鬥氣，唔使講喇，鬥氣又好，唔忿氣又好，話我小器都好，我淨係知留低係冇骨氣。
雖然結局係反轉，但我覺得今次呢單嘢好受傷，或者我都要反省下自己人緣點解咁差，不過點都好啦，呢段時間看盡人情冷暖，希望下一份工會更好。
投稿讀者：Hubert
===
😟 喺咩原因令你喺公司愈嚟愈沉默？
《容不下有意見嘅人，唔啱聽就要踢走》
https://hkofficedaily.com/?p=13247