投稿讀者：匿名
睇住舊公司每況愈下，最近仲要裁員，心裡面百感交集，一面嗌抵死，一面又唔忍心。
我舊公司係做online business，即係大家平時幫襯開嘅網上商店，當時我係部門主管，睇住有heart嘅員工一個又一個咁走，唯命是從又求其嘅員工反而全部留低，感覺真係好無奈，亦覺得呢間公司末日將至，問題只係幾時燒完啲錢。
我臨走前幾個月，公司請咗個後生仔，佢好醒目，幾幫得手，起碼有朝氣，不過成班人同老細開會嗰陣，老細問大家有咩意見，呢個後生仔真係拎個心出嚟逐點分析：「我覺得公司個online store唔得，好擾民，人哋嚟消費要upload呢樣嗰樣，upload完又冇反應，成個畫面黑晒，仲feel到部手機好熱，咁樣好趕客㗎喎！其實個框可唔可以整得簡單啲，我估嗰度係拖慢成個網嘅原因。」
佢提出嘅問題，呢度所有人都知，不過我哋平時會用較婉轉嘅方式向老細表達，例如：「check out嗰度有少少窒喎。」、「唔知係咪我個台太慢呢？Load得比較耐，可能要轉台先得喇。」、「側邊彈出嚟嗰度，可能我手指粗，有時想撳走會跳咗去另一頁。」
我哋咁樣講，因為太清楚老細嘅玻璃心，亦好了解老細根本係一言堂。
老細個秘書私下同我講過：「佢叫我開會嗰陣多啲聽你哋嘅意見，然後記低佢，睇下係邊個對佢有意見。」
仍然會借頭借路講下咩「少少窒」、「自己個台太慢」、「手指粗撳錯」……等等嘅同事，已經叫做有啲良心，更多同事開會直情採取沉默應對，又或者一味附和，點解？因為要保住份工囉！保住份工同份糧緊要啲，定係意見被採納緊要啲，係每個人各自嘅選擇，有人本身就係呃飯食，有人本身好有理想但稜角被磨平，有亦人睇錢份上可以埋沒良心，唔單止公司，社會一向都係充斥住各種唔同嘅人。
所以當日嗰位後生仔毫不修飾地講出網站所有問題，我幾乎肯定佢喺呢間公司嘅日子已經步入倒數階段，因為老細唔需要意見，佢需要嘅係睇下邊個有意見，再踢走有意見嘅人。
只係大家都知道，一間公司需要進步同成長，唔可以掩耳盜鈴咩都讚好，呢個係走下坡同玩完嘅先兆，問題係你公司有幾硬淨，可以捱到幾耐。當然，我都見過一啲二世祖開嘅公司，就算個個月蝕錢，資金鏈都唔會斷，因為對老細嚟講呢度只不過係散紙，我公司嘅情況就差唔多。
嗰位後生仔當時提出意見之後，老細喺會上係笑笑口，不過同日下晝就叫咗我入房，話唔好畀佢過試用期，然後我又要做醜人，再睇下自己條team嗰班咩都無所謂，咩都冇意見嘅同事，我作為主管都好無奈，後生仔走咗之後，我自己都意興闌珊，所以不斷托headhunt幫我搵工，符碌地總算搵到。
Last day前幾日，老細秘書同我講：「你睇下臨走前可唔可以叫班同事開會踴躍啲，畀啲反應，雖然老細假民主啫，佢哋都要交下戲㗎嘛，問親咩都話冇意見，咩都話幾好，老細覺得佢哋開會時太沉默。」
我臨走前真係有提過佢哋，不過呢班行屍走肉嘅員工相信唔會改變，因為佢哋覺得根本唔可以改變老細，咁倒不如呃盡佢，一旦公司唔掂咪蟬過別枝轉工囉，呢種情況喺好多地方都會發生。
同事們開會嗰陣唔係突然之間變沉默，佢哋只係慢慢變得沉默，冰封三尺，非一日之寒。
有問題就提出，可以帶嚟改善同埋力量，可以令一切變得更好，所以我哋選擇發聲，但係當講出嚟之後並冇改善，仲一次又一次令自己受傷，各人就慢慢地選擇咗沉默保命。
我離開咗呢間公司兩年，最近有舊同事話我知，公司生意每況愈下，年底前會裁員，我覺得係意料之內，如果當時老細接納唔同嘅聲音同意見，或者會有得救，但佢選擇唔聽真心說話同埋踢走勇於表達嘅同事，留低嘅全部都係傀儡同應聲蟲，玩完其實係遲早嘅事。